რუსეთის ბაზარზე ქართული ბოსტნეულის და ხილის შეტანა დღეიდან აღდგება

პოლიტიკა - 15:30, 26 May, 2014

1372

საქართველოს ეკონომიკის მინისტრი გიორგი კვირიკაშვილი ქართული სოფლის მეურნეობის პროდუქტებისათვის რუსეთის ბაზრის გახსნას მიესალმება, თუმცა ამბობს, რომ რისკები არსებობს.

"მინდა მივესალმო, რომ რუსეთის ბაზარზე შევიდა ქართული სოფლის მეურნეობის პროდუქცია. ეს ძალიან მნიშვნელოვანია და ჩვენი რიგითი მოქალაქეების ცხოვრებას გააიოლებს. თუმცა რა თქმა უნდა არის რისკები. გამომდინარე იქიდან, რომ სხვადასხვა ტიპის განცხადებები კეთდება. მაგრამ ვნახოთ, ჩვენ ვფიქრობთ რომ ჩვენი თანმიმდევრული ევროინტეგრაციის პოლიტიკით და ამავე დროს ნორმალური კონსტრუქციული განწყობით, რომ განვითარდეს ვაჭრობა და ტურიზმი რუსეთთან მივაღწევთ იმას, რომ გრძელვადიან პერსპექტივაში სხვა პრობლემაც დარეგულირდება. რისკებთან დაკავშირებით ჩვენ ვაფრთხილებდით და დღესაც ვაფრთხილებთ ქართველ მეწარმეებს, რომ რუსეთის ბაზარი დივერსიფიკაციის საშუალებად გამოიყენონ და ეს მათთვის ერთად ერთი ბაზარი არ იყოს" – განაცხადა გიორგი კვირიკაშვილმა.

რუსეთის ბაზარზე ქართული ბოსტნეულის და ხილის შეტანა 26 მაისიდან აღდგება. ამის შესახებ ინფორმაციას რუსეთის ვეტერინარული და ფიტოსანიტარიული ზედამხედველობის სამსახურმა 22 მაისს (“როსსელხოზნადზორმა”) გაავრცელა.