პოროშენკოს მრჩეველად სააკაშვილსა და ბენდუქიძესთან ერთად გრიგოლ ქათამაძეც მოიაზრება

პოლიტიკა - 14:54, 26 May, 2014

2391

უკრაინის ახლადარჩეულ პრეზიდენტ პეტრე პოროშენკოს ერთ–ერთი მრჩეველი სავარაუდოდ საქართველოს ყოფილი ელჩი უკრაინაში გრიგოლ ქათამაძე იქნება.
„Russia Today“-ს ცნობით, უკრაინის ახალი პრეზიდენტის მრჩევლად მიხეილ სააკაშვილი და კახა ბენდუქიძე მოიაზრება. ამის შესახებ პარტია „უდარის“ ლიდერმა და კიევის ახლადარჩეულმა მერმა ვიტალი კლიჩკომ, ადგილობრივი ტელეარხის ეთერში განაცხადა.

„საქართველო ჩვენთვის მაგალითია. მე ამის შესახებ ბევრ ადამიანს ვესაუბრე. ვესაუბრე მიხეილ სააკაშვილსაც და მან თავის მხრივ დახმარება შემომთავაზა. ამასთან, ვესაუბრე კახა ბენდუქიძესაც და დარწმუნებული ვარ, რომ თუკი ამის საჭიროება დადგა, თითოეული მათგანი დაგვეხმარება“,-განაცხადა კლიჩკომ.

ასევე ვრცელდება ინფორმაცია, რომ უკრაინის ახლად არჩეული პრეზიდნეტის მრჩევლად საქართველოს ექს-პრეზიდენტი მიხეილ სააკაშვილი და ეკონომიკის ყოფილი მინისტრი კახა ბენდუქიძე იქნებიან. აღნიშნულ ინფორმაციას თავად უკრაინის პრეზიდენტი ჯერჯერობით არ ადასტურებს, თუმცა ამბობს, რომ მის მრჩევლებს შორის საქართველოს მოქალაქეები აუცილებლად იქნებიან.

“დღეს შემიძლია, ერთი ინფორმაცია გაგიმხილოთ, ჩემს მრჩევლებს შორის საქართველოს მოქალაქეები იქნებიან, თუ ვინ – ეს ჯერ ინტრიგად დარჩეს”, - აღნიშნა პოროშენკომ.