ახალციხეში ადგილობრივ მოსახლეობასთან შეხვედრისას საქართველოს პრემიერმინისტრმა ირაკლი ღარიბაშვილმა განაცხადა, რომ ახალი ხელისუფლებისთვის პრიორიტეტს სოფლის გაძლიერება წარმოადგენს:

„თქვენ ძალიან მშრომელი ხალხი ხართ და მე ამაყი ვარ, როგორც საქართველოს მოქალაქე, რომ ასეთი მშრომელი ხალხი ცხოვრობს ამ რეგიონში. დარწმუნებული ვარ, თქვენ დიდ წვლილს შეიტანთ იმ საქმეში, რასაც საქართველოს აღმშენებლობა ჰქვია. თქვენი ჩართულობის გარეშე, ის საერთო კეთილდღეობა, რაც ჩვენ გვინდა, რომ მოვუტანოთ ჩვენს ქვეყანას, მიუღწევადი იქნება. ჩვენი სოფლის მეურნეობა, ახალციხელების, ადიგენელების, ახალქალაქელების, ბორჯომელების გარეშე წარმოუდგენელია.

ყველამ კარგად ვიცით ამ მიწის და თქვენი მარჯვენის ფასი. ჩვენი ხელისუფლებისთვის ერთ–ერთი მთავარი მიზანია მივხედოთ სოფელს, რადგან ქვეყნის გაძლიერება მხოლოდ სოფლის გაძლიერებით იწყება. ჩვენ დავიწყეთ იაფი აგროკრედიტების გაცემა და ამან თავისი შედეგი მოიტანა. ასეთი იაფი აგროსესხის წყალობით ჩვენ გვექნება პირველი მსხვილფეხა საქონლის საჯიშე მეურნეობა საქართველოში, რომელიც საერთაშორისო სტანდარტებს დააკმაყოფილებს. მე ეს მაგალითი იმიტომ მომყავს, რომ იაფი აგროსესხებით თქვენ მართლაც კარგი შესაძლებლობები გაქვთ, რომ საკუთარი მეურნეობა განავითაროთ. სოფელში ხალხი ამოისუნთქებს და საკუთარი შრომით თავადაც ნახავს სარგებელს და სხვასაც დაასაქმებს.

1 ივნისს დაიწყება სახელმწიფო პროგრამა „აწარმოე საქართველოში“. ეს გულისხმობს ყველა რეგიონში, შემდეგ კი ყველა რაიონსა და სოფელში ტრადიციული ადგილობრივი წარმოების აღდგენას. ეს გააჩენს სამუშაო ადგილებს და ხალხი დასაქმდება. ჩვენ გვექნება უმაღლესი ხარისხის ადგილობრივი პროდუქცია, რომელიც უცხოურს გაუწევს კონკურენციას და ყველასთვის იქნება საამაყო. ეს ჩემი ოცნებაა და ვიცი რომ თითოეული ქართველის ოცნებაცაა“,– განაცხადა პრემიერმა.