ენერგეტიკის სამინისტრო სპეციალურ განცხადებას ავრცელებს და ინფორმაციას იმის შესახებ, რომ მინისტრ კახა კალაძესთვის საბიუჯეტო სახსრებიდან პრემიის სახით გაცემულია 48 ათასი ლარი, სიცრუეს უწოდებს.

,,ნიუპოსტი“ უცვლელად გთავაზობთ ენერგეტიკის სამინისტროს პრესსამსახურის მიერ გავრცელებულ განცხადებას.

,,ბოლო დღეებში სხვადასხვა მედიასაშუალებებში ნაციონალური მოძრაობის წევრების მიერ არაერთგზის გაიჟღერა რომ ენერგეტიკის მინისტრს, ვიცე-პრემიერ კახა კალაძეს პრემიის სახით მიღებული აქვს 48 000 ლარი. გვინდა საზოგადოებას ვაცნობოთ, რომ ამ ინფორმაციას რეალობასთან არავითარი კავშირი არ აქვს. კახა კალაძეს, ენერგეტიკის მინისტრის თანამდებობაზე დანიშვნიდან დღემდე, საბიუჯეტო სახსრებიდან პრემიის სახით არცერთი ლარი არ მიუღია. რაც შეეხება მინისტრის ხელფასს, ის მთლიანად ირიცხება სხვადასხვა საქველმოქმედო ფონდებსა თუ ანგარიშებზე და მძიმე სნეულებებით დაავადებული მოქალაქეების მკურნალობას ხმარდება. რასაკვირველია ეს ინფორმაცია არასდროს ოფიციალურად არ გაჟღერებულა, ვინაიდან ქველმოქმედებას აფიშირება არ სჭირდება. აქვე შევახსენებთ ნებისმიერ დაინტერესებულ პირს, ენერგეტიკის სამინისტროს შესაბამის დეპარტამენტში ამ იმფორმაციაზე წვდომა თავისუფალია, ამიტომ ნებისმიერი ცრუ ინფორმაციის მედიით გაჟღერება მხოლოდ განმცხადებლის რეპუტაციას აყენებს ჩრდილს“, - ნათქვამია უწყების პრესცენტრის განცხადებაში.