გაბაშვილი: ღირსეულ ანაზღაურებასა და სიგიჟეს შორის დიდი განსხვავებაა

პოლიტიკა - 22:17, 23 May, 2014

1866

საპარლამენტო უმცირესობის წევრი გოკა გაბაშვილი სასჯელაღსრულების სისტემაში გაცემული პრემიების თემას ეხმაურება.

გაბაშვილი აცხადებს, რომ ადამიანები ვინც ამ სისტემაში მუშაობენ, იმსახურებენ ღირსეულ ანაზღაურებას, თუმცა გაბაშვილის თქმით, ღირსეულ ანაზღაურებასა და სიგიჟეს შორის დიდი განსხვავებაა.

„უნდა გავარჩიოთ რამდენიმე საკითხი ერთმანეთისგან, მინისტრების მიერ აღებული პრემიები ძალიან მაღალია, მიუხედავად იმისა, რომ ხელფასი გაიორმაგეს, ამის ზემოთ აღებული აქვთ დაახლოებით 80 ათასამდე, დაწყებული ბატონი ალასანიასგან, დამთავრებული ბატონი კალაძით 48 ათასი ლარით, ეს არის პრემია.

აქ არის ლაპარაკი იმაზე, რომ ეს ხალხი რომელიც ლაპარაკობდა, რომ ბიუჯეტს უნდა მოვეპყრათ როგორც საერთო სიმდიდრეს, სინამდვილეში ბიუჯეტი გაარღვიეს 800 მილიონი ლარით, დაადეს ქვეყანას 1.5 მილიარდიანი ვალი, მთავრობა ხალხს უჯდება 138 მილიონი ლარით მეტი“,- განაცხადა გოკა გაბაშვილმა.

ამის შესახებ დეპუტატმა ტელეკომპანია "იმედის" ეთერში გადაცემა "რეაქციაში" სტუმრობისას განაცხადა.

„ამასთან არის პრემიებიც კონკრეტული დანაშაულებრივი მოქმედებებისთვის. დარბაისელს პრემია რომ მიღებული აქვს მერაბიშვილის ციხიდან გატაცების შემდეგ 3 დღეში და ასე ვთქვათ „აკაჩავა“, ეს იყო მაღალი თანამდებობის მიერ მიცემული დავალება, სხვა შემთხვევაში 40 ათასიან პრემიებს ვერ მიიღებდნენ. ეს სფერო ძალიან მძიმეა და ადამიანები, რომლებიც ამ სფეროში მუშაობენ იმსახურებენ ღირსეულ ანაზღაურებას, მაგრამ ღირსეულ ანაზღაურებასა და სიგიჟეს შორის არის ძალიან დიდი განსხვავება. მინისტრების და მათი მოადგილეების პრემიები მაღალია, მაგრამ ადამიანების პრემიები, რომლებიც მსგავს საქმეებს აკეთებენ, მათი პრემიები საერთოდ ასტრონომილია“, - განაცხადა გოკა გაბაშვილმა.