ბესელია: აუცილებელი იყო ხალხს ეგრძნო, რომ მოვიდა ხელისუფლება

პოლიტიკა - 22:14, 23 May, 2014

1830

პარლამენტის ადამიანის უფლებათა დაცვის კომიტეტის თავმჯდომარე ეკა ბესელია აცხადებს, რომ პირველი ნაბიჯი, რომელიც „ქართულმა ოცნებამ“ გადადგა ეს თავისუფლების აქტი იყო.
ამის შესახებ დეპუტატმა ტელეკომპანია "იმედის" ეთერში გადაცემა "რეაქციაში" სტუმრობისას განაცხადა.

„პირველ რიგში, როდესაც ვსაუბრობთ ვისი ოცნება შეიძლება ასრულდეს, ქართველი ხალხია ადრესატი, რომელსაც ელოდება ის ცვლილებები, ის სრულიად ახალი ფილოსოფია რომლითაც „ქართული ოცნება“ შემოვიდა პოლიტიკურ პროცესში განხორციელდეს და დადგეს დანაპირებების შესრულების ეტაპი. აუცილებელი იყო ხალხს ეგრძნო, რომ მოვიდა ხელისუფლება, რომელიც ხალხის წინაშეა პირველ რიგში ანგარიშვალდებული. პირველი ნაბიჯი, რომელიც „ქართულმა ოცნებამ“ გადადგა ეს იყო თავისუფლების აქტი, ეს იყო ხაზგასმა იმისა, რომ ადამიანი არის მთავარი ღირებულება.

ამის შემდეგ დაიწყო სოციალური პროექტების განხორციელება, შთამბეჭდავი იყო დასაწყისშივე, ბიძინა ივანიშვილის პირველი პროექტი, როდესაც საქართველოს ხელისუფლების სოფელი ერთ-ერთი მთავარი ორიენტირი გახდა. დაიწყო ჯანდაცვის პროექტი და გადავედით იმ ეტაპზე, როდესაც უნივერსალური ჯანდაცვის პროექტი შევთავაზეთ მოსახლეობას. ბიუჯეტი დალაგდა ისე, რომ პირდაპირ იქნა ჩაწერილი რისთვის უნდა იყოს პირველ რიგში მიმართული ბიუჯეტი“, - განაცხადა ეკა ბესელიამ.