პრემიერ-მინისტრი სასჯელაღსრულების დეპარტამენტტის ხელმძღვანელის დიმიტრი დარბაისელის გადადგომას ეხმაურება. ირაკლი ღარიბაშვილის შეფასებითი, დარბაისელს შეცდომა მოუვიდა და ღირსეულად მოიქცა, როდესაც თქვა, რომ პრემიების გაცემა მისი გადაწყვეტილება იყო.

„რა თქმა უნდა, მიუღებელი იყო პრემიები, მას მოუვიდა შეცდომა. მინდა გითხრათ, რომ ძალიან ვაჟკაცური ნაბიჯი გადადგა და ღირსეული გადაწყვეტილება მიიღო. ეს დასაფასებელია. ჩვენ ხარვეზების და შეცდომების არ გვეშინია. თუ ოდესმე რაღაც შეცდომა მოგვდის, მას მაშინვე ვასწორებთ და ეს ყველაზე მთავარი მონაპოვარია ჩვენი ხელისუფლებისთვის. ჩვენი მუშაობის სტილი დაფუძნებულია გამჭვირვალობაზე და სამართლიანობაზე. ჩვენს მხარესაა სიმართლე და მას ძალიან ვუფრთხილდებით. ის, რომ პატარა გადაცდომა იყო, ამისგან ტრაგედია არ უნდა შევქმნათ. ამ ადამიანმა და მისმა გუნდმა ურთულესი საქმე შეასრულა და მინდა მის გუნდს მადლობა გადავუხადო. მათ ციხე დაალაგეს და ის პრობლემები, რაც წლების განმავლობაში არსებობდა, აბსოლუტურად სხვა, ცივილიზებული მეთოდებით აღმოფხვრეს. ამას ძალიან დიდი შრომა სჭირდებოდა. ვიცი, რომ კვირების განმავლობაში ეს ადამიანები სახლში არ მიდიოდნენ და ოჯახის წევრებს ვერ ნახულობდნენ. ამას სახელმწიფოს მხრიდან დაფასება სჭირდება. ის, რომ დარბაისელი საკუთარი სურვილით გადადგა, მისი მხრიდან სწორი, საღი და სახელმწიფოებრივი გადაწყვეტილებაა“, - განაცხადა ირაკლი ღარიბაშვილმა.

დიმიტრი დარბაისელმა სასჯელაღსრულების დეპარტამენტის ხელმძრვანელის პოსტი საკუთარი ნებით დატოვა.