ევროკავშირთან ასოცირების ხელშეკრულებას საქართველოს პრემიერ-მინისტრი ირაკლი ღარიბაშვილი მოაწერს ხელს. ამის შესახებ მთავრობის კანცელარიაში გამართულ ბრიფინგზე მთავრობის საპარლამენტო მდივანმა შალვა თადუმაძემ განაცხადა.

“ყველა სახის საერთაშორისო მოქმედებები, დაწყებული საერთაშორისო მოლაპარაკებებიდან, დასრულებული ხელმოწერის პროცედურით ხორციელდება მთავრობასთან შეთანხმებით, ხელმოწერა შემდეგ საჭიროებს პრემიერ–მინისტრის კონტრასიგნაციას. გამომდინარე იქიდან, რომ აღნიშნული ხელშეკრულების ხელმოწერის პროცედურებზე პრეზიდენტს არ ჰქონია მიღებული გადაწყვეტილება მოლაპარაკების წარმოების თაობაზე და არც მთავრობას ჰქონია არასოდეს უფლებამოსილება, მიცემული მისთვის იმის თაობაზე, რომ განეხორციელებინა ასოცირების ხელშეკრულებასთან დაკავშირებულ საკითხებზე მოლაპარაკებების განხორციელებაზე, მთავრობა პრაქტიკულად შეუძლებლად წარმოიდგენს იმას, რომ მისცეს პრეზიდენტს უფლებამოსილება, ხელი მოაწეროს აღნიშნულ ხელშეკრულებას. გამომდინარე იქიდან, რომ ხელშეკრულების ნაკისრი ვალდებულებები მთავრობის შესასრულებელია. გამომდინარე აქედან, რომ საერთაშორისო საზოგადოებისთვის ცოტა გაუგებარი იქნება განმარტებები იმის თაობაზე, რომ პრეზიდენტის მიერ ხელმოწერილ აქტს არ აქვს იურიდიული ძალა, ვიდრე მას არ მოაწერს ხელს პრემიერ–მინისტრი, შესაბამისად, მთავრობა წარმართავდა ხელმოწერამდე პროცედურებს და მთავრობაა ვალდებული, პრემიერის მეთაურობით ხელი მოაწეროს ხელშეკრულებას და ნაკისრი ვალდებულებები შეასრულოს“, – განაცხადა თადუმაძემ.

საქართველოსა და ევროკავშირს შორის ასოცირების შეთანხმება 27 ივნისს გაფორმდება.