რუსეთის ფედერაციის საგარეო საქმეთა სამინისტროს ოფიციალური წარმომადგენელი ალექსანდრე ლუკაშევიჩი აცხადებს, რომ მოსკოვში განგაშს საქართველოს თავდაცვის მინისტრის ირაკლი ალასანიას მოწოდებები იწვევს, რომელიც საქართველოს ტერიტორიაზე ნატო–ს თავდაცვითი სისტემის განთავსებას ეხება.

,,საქართველოში ზოგიერთი პოლიტიკოსი ნებისმიერ ფასად ცდილობს მიაღწიოს ნატო–სთან შეერთებას. ჩვენთან განგაშს იწვევს საქართველოს თავდაცვის მინისტრის ირაკლი ალასანიას განცხადებები, რომელიც მან ვაშინგტონში გააკეთა და რომლითაც მოუწოდებდა საქართველოში განეთავსებინათ ამერიკული ან ნატო–ს თავდაცვითი სისტემები. თბილისის რეალურ მიზნებზე ჩვენ კითხვები გვიჩნდება, რა აქვთ მხედველობაში და ვისგან უნდა დაიცვან ამ სისტემებმა“– აცხადებს ლუკაშევიჩი.

ვაშინგტონში, ატლანტიკური საბჭოს მიერ ორგანიზებულ კონფერენციაში სიტყვით გამოსვლისას, საქართველოს თავდაცვის მინისტრმა ალიანსს საქართველოში ნატო-ს სამხედრო თავდაცვითი სისტემების განთავსებისკენ მოუწოდა.