ნავი პილაიმ საქართველოში ვიზიტის შედეგები შეაფასა

პოლიტიკა - 18:37, 21 May, 2014

1642

გაერო-ს ადამიანის უფლებთა უმაღლესმა კომისარმა ნავი პილაიმ საქართველოში ვიზიტის შედეგები შეაფასა.

მან აღნიშნა, რომ საკმაოდ ნაყოფიერი შეხვედრები გამართა ხელსუფლების უმაღლესი თანამდებობის პირებთან, უზენაესი სასამართლოს თავმჯდომარესთან, სახალხო დამცველთან და სამოქალაქო საზოგადოების წარმომადგენლებთან.
პილაის თქმით, მთავრობამ, რომელსაც სათავეში პრემიერ-მინისტრი უდგას, მნიშვნელოვანი რეფორმები გაატარა ადამიანის უფლებათა და კანონის განმტკიცების კუთხით.
“მათგან ერთ-ერთ ეხება პოლიტიზებულ და გაუმართავ სასამართლოს და სამართალდამცველ სისტემებს, მიღწეულია პროგრესი და არ შეიძლება ეს სათანადოდ არ დაფასდეს. უკანასკნელ პერიოდამდე 99.9% განსასჯელთა მიმართ გამამტყუნებელი განაჩენი დგებოდა. დღეს გაიზარდა გამამრთლებელ განაჩენთა რიცხვი და მოსამართლეები უფრო დამოუკიდებელნი და მოთხოვნი გახდნენ პროკურატურისა და აღმასრულებელი ხელისუფლების წარმომადგენელთა მიმართ. ხელისუფლება აცნობიერებს, რომ კიდევ ბევრი რამაა გასაკეთებელი, რათა სათანადოდ მოხდეს როგორც პროკურორების, ისე მოსამართლეების პროფესიული მომზადება”, - განაცხდა პილაიმ და დასძინა, რომ საქართველოს ჰყავს ძალიან აქტიური და ეფექტური სამოქალაქო საზოგადოება, რომელსაც რეფორმის საქმეში მნიშვნელოვანი წვლილი შეაქვს.
გაერო-ს უმაღლესი კომისარი აცხადებს, რომ მნიშვნელოვანია საქართველოში მიმდინარე სასამართლო პროცესები აღიქმებოდეს, როგორც სამართლიანი და გამჭვირვალე, რომელსაც კავშირი არ აქვს პოლიტიკურ შურისძიებასთან.
გაერო-ს უმაღლესმა წარმომადგნელმა მოუწოდა უზენაესი სასამართლოს თავმჯდომარეს, მოსამართლეებს, პროკურორებსა და სამართალდამცველი სისტემის წარმომადგენლებს, რომ სასამართლო რეფორმის ფარგლებში მჭიდროდ ითანამშრომლოს.