რას შეპირდა პუტინი ბაროზოს

პოლიტიკა - 18:14, 21 May, 2014

1830

ევროკომისიის თავმჯდომარის ჟოზე მანუელ ბაროზოს განცხადებით, ვლადიმერ პუტინმა პირობა დადო, რომ ხელს არ შეუშლის საქართველოს მოლაპარაკებებს ასოცირების ხელშეკრულებაზე.

"რაც შეეხება რუსეთთან ურთიერთობებს, ჩვენ თანამოაზრეებს განვუცხადეთ შეხვედრებზე, რომ ნამდვილად არ ვართ დაინტერესებულები ამ ურთიერთობების გაუარესებით. ჩვენ ველოდებით, რომ რუსეთი საერთაშორისო სამართალს პატივს უნდა სცემდეს. უკრაინას უფლება აქვს მოაწეროს ჩვენთან ხელშეკრულებას ხელი, ისევე, როგორც საქართველოს.

რუსეთს გააჩნია უფლება სხვა მხარეებთან გააფორმოს ხელშეკრულებები, ამას ჩვენ ვერ შევეწინააღმდეგებით და ძალიან მნიშვნელოვანია გავიგოთ, რომ XXI საუკუნეში არ შეიძლება კონფრონტაციის, ცივი ომის ლოგიკის გამოყენება, გავლენის სფეროების გადანაწილების მიდგომები", - განაცხადა ბაროზომ.

ბაროზომ, რუსეთის პრეზიდენტთან შეხვედრა და ვლადიმერ პუტინის მიერ მიცემული დაპირებაც გაიხსენა:

"უკრაინის ბოლო მოვლენებამდე პრეზიდენტი პუტინი ბრიუსელში იმყოფებოდა ვიზიტით და მე და ევროპის საბჭოს პრეზიდენტმა განვუცხადეთ ნათლად და გახსნილად პრეზიდენტ პუტინს, რომ ჩვენ ველოდებით, რომ იგი ხელს არ შეუშლიდა მოლაპარაკებებსა და ხელშეკრულებებს, რომელსაც საქართველოსთან ვამზადებთ და მან მოგვცა დაპირება, რომ ასე არ მოიქცეოდა. ყოველ შემთხვევაში, ასე განაცხადა და ჩვენ იმედი გვაქვს, რომ რუსეთი სრულად სცემს პატივს საქართველოს სუვერენულ უფლებას, გააფორმოს ხელშეკრულება ევროკავშირთან", - აღნიშნა ჟოზე მანუელ ბაროზომ საქართველოს პრემიერ-მინისტრ ირაკლი ღარიბაშვილთან გამართულ ერთობლივ ბრიფინგზე.