სალომე ზურაბიშვილმა ნინო ბურჯანაძეს "უსამართლობის პრინცესა“ უწოდა

პოლიტიკა - 16:17, 21 May, 2014

2594

საქართველოს საგარეო საქმეთა ყოფილი მინისტრი სალომე ზურაბიშვილი ,,ქართულ ოცნებას“ აკრიტიკებს და არჩევნების გაყალბებას არ გამორიცხავს, ზურაბიშვილი ნინო ბურჯანაძეს კი "უსამართლობის პრინცესას' უწოდებს.

ამის შესახებ ყოფილი მინისტრი გაზეთ "ვერსიასთან" ინტერვიუში საუბრობს. ზურაბიშვილის თქმით, ხელისუფლება ცდილობს საზოგადოებას ირეალური პრობლემები მოახვიოს თავს, ხოლო რეალურ პრობლემებს კი "ფარდა გადააფარონ". იგივეს ფიქრობს ზურაბიშვილი ოპოზიციურ ძალასთან მიმართებაშიც.
"მითებს ყველა ის ძალა ქმნის, რომელსაც რეალური პრობლემების გადასაჭრელად ხედვა არ გააჩნია. ამ შემთხვევაში მხოლოდ ხელისუფლებას არ ვგულისხმობ. მაგალითად, ნინო ბურჯანაძე რომ ამბობს, სამართლიანობა უნდა აღდგესო, მან ეს როგორ უნდა მოახერხოს, როცა თავად უსამართლობის პრინცესა გახლდათ? ბუნებრივია, დამნაშავეთა მცირე წრე უნდა გასამართლდეს, მაგრამ ამის შემდეგ დიდი შერიგებაც აუცილებელია“, - ამბობს სალომე ზურაბიშვილი და საძენს, რომ საზოგადოების დანაწევრების შემთხვევაში, "რუსეთს მონებად ჩავბარდებით, რაც ზოგიერთებისთვის საკმაოდ კომფორტულია“.

ყოფილი მინისტრი მიიჩნევს, რომ ,,ქართული ოცნებისგან“ მარტო "ნაციონალური მოძრაობის" ლანძღვა არ არის საკმარისი, "მოსახლეობას ქვეყნის განსავითარებლად ერთიანი ხედვის გაზიარება სჭირდება!“, - აცხადებს სალომე ზურაბიშვილი.