ცესკო-მ რუსთავისა და ფოთის "ქართული ოცნების" მერობის კანდიდატების რეგისტრაციასთან დაკავშირებით საოლქო საარჩევნო კომისიის გადაწყვეტილება ძალაში დატოვა. დავით ჯიქია და ირაკლი კაკულია საარჩევნო კამპანიას გააგრძელებენ.

აღნიშნული გადაწყვეტილება ცენტრალურმა საარჩევნო კომისიამ მიიღო.

„ცენტრალურმა საარჩევნო კომისიამ იმსჯელა „ქართული ოცნების“ მერობის ორ კანდიდატთან დაკავშირებით. ცსკ კოლეგიალური ორგანოა, შესაბამისად, 7 ხმით ძალაში დარჩა საოლქო საარჩევნო კომისიის თავმჯდომარეების გადაწყვეტილებები მათი რეგსიტრაციის შესახებ. პირადად მე მხარი არ დამიჭერია, ვინაიდან ჩემი მიდგომა იყო ერთგვაროვანი ანალოგიური შემთხვევის მიმართ და შესაბამისად, ამ შემთხვევაშიც“, – განაცხადა ცსკ–ს თავმჯდომარე თამარ ჟვანიამ.

„ქართული ოცნების“ რუსთავისა და ფოთის მერობის კანდიდატების რეგისტრაციიდან მოხსნას, რამდენიმე საარჩევნო სუბიექტი ითხოვდა. მოთხოვნის მიზეზად იმ ფაქტს ასახელებენ, რომ მათ ბოლო ორი წლის განმავლობაში საქართველოში არ უცხოვრიათ.