უმრავლესობის წევრი თინა ხიდაშელი საარჩევნო კანონმდებლობასთან და პოლიტიკურ ზეწოლასთან დაკავშირებით "ახალგაზრდა იურისტთა ასოციაციის" შენიშვნებს არ ეთანხმება.

ხიდაშელი მიიჩნევს, რომ საარჩევნო კოდექსში ბევრი პოზიტიური ცვლილება განხორციელდა და წუხილს გამოთქვამს, რომ „ეს ქართულმა ორგანიზაციებმა ვერ დაინახეს“.

"არ ვიცი რას გულისხმობენ საარჩევნო კანონმდებლობის არდახვეწაში. საარჩევნო კოდექსში იმდენი პოზიტიური ცვლილება განხორციელდა, რაც ერთი საარჩევნო ციკლის ფარგლებში არასდროს მომხდარა. საბედნიეროდ, ყველა საერთაშორისო ორგანიზაციამ დაინახა, ვინც ამ თემაზე მუშაობს და ვწუხვარ, თუ ქართულმა ორგანიზაციებმა ვერ დაინახეს.

რაც შეეხება "ნაციონალური მოძრაობის" მიმართ ზეწოლის განხორციელებას, ამ შემთხვევაში, თუკი კონკრეტულ ფაქტებზე არ ვიმსჯელებთ, ზოგადი საუბარი ძალიან რთულია. საქართველო იყო ქვეყანა, სადაც ყველა ადამიანი, დამლაგებლით დაწყებული, პრეზიდენტით დასრულებული, ერთი პოლიტიკური პარტიის წევრი იყო. ქეყანაში უამრავი კანონდარღვევა ხდებოდა, ამიტომ ძალიან ადვილია "ნაციონალური მოძრაობისთვის", თუკი ვინმეს დაკითხვის საკითხი დადგება, გამოაცხადოს, რომ ადგილი აქვს საარჩევნო ზეწოლას", - განუცხადა ჟურნალისტებს თინა ხიდაშელმა.

საიამ დღეს წინასაარჩევნო გარემოს მონიტორინგის პირველი შუალედური ანგარიში წარმოადგინა.

საანგარიშო პერიოდში, საია-ს მონიტორების მიერ საჯარო მოხელეთა მხრიდან აგიტაციის წესების დარღვევის სამი, ადმინისტრაციული რესურსის გამოყენების - ერთი, ამომრჩევლის მოსყიდვის - ერთი, საარჩევნო პროცესებთან სავარაუდოდ დაკავშირებული სისხლის სამართლებრივი დევნის - 7, ადმინისტრაციული სამართალდარღვევის შეფარდების - 18, ფიზიკური ანგარიშსწორების - 1 და სავარაუდოდ, პოლიტიკური ნიშნით სამსახურიდან გათავისუფლების 9 ფაქტი დაფიქსირდა.