„მაესტროს“ გენერალური დირექტორი მამუკა ღლონტი მთავრობის კანცელარიის მიერ ვახო სანაიას გადაცემასთან გაკეთებულ განცხადებას მედიაზე ზეწოლად აფასებს.

ღლონტის თქმით, „ხელისუფლება მედიას არ უნდა აკრიტიკებდეს“.

„პირადად მე ამ განცხადებას მედიაზე ზეწოლად აღვიქვამ და ვთვლი, რომ მედიის კრიტიკა არ არის ხელისუფლების საქმე. პირიქით, ყველა ხელისუფლებაში მედია აკრიტიკებს ხელისუფლებას. რაც შეეხება განცხადებაში მოყვანილ კონკრეტულ ბრალდებებს, რაც წაგვიყენა ჯერ ხელისუფლებამ და შემდეგ „ქართულ ოცნებამ“ კარგი იქნება თუ დამკვიდრდება ისეთი პრაქტიკა, რომ მიბრძანდნენ სასამართლოში, გვიჩივლონ და სასამართლომ გაარჩიოს მტყუან-მართალი“, - განაცხადა მამუკა ღლონტმა.

პრემიერ-მინისტრის უწყება „მაესტროს“ ჟურნალისტს ვახო სანაიას ტენდენციურობაში ადანაშაულებს. საქმე ეხება ვახო სანაიას საავტორო გადაცემას, სადაც ერთ-ერთ თემად „ქართული ოცნების“ დაპირებები იყო. როგორც განცხადებაშია ნათქვამი, „გადაცემის მსვლელობისას, ჟურნალისტი ცდილობდა, შეექმნა სურათი, თითქოს ხელისუფლებამ არც ერთი დაპირება არ შეასრულა“.