ჟურნალისტი ვახო სანაია მთავრობის ადმინისტრაციის მიერ გავრცელებულ განცხადებას „ფესიბუქზე“ ეხმაურება.

„მთავრობის ადმინისტრაციის პრესსამსახური: ,,სიცრუის გამყარებისთვის მან [ვახო სანაიამ] ქუჩაში ხალხის გამოკითხვის ხერხსაც მიმართა..."

ქუჩაში ხალხის გამოკითხვის ხერხი სიცრუის გამყარებისთვის, როგორ უნდა გამოიყენო, ვინმემ იცით ? ვთავაზობ მთავრობას, გამომაყოლოს ამ ტექსტის ავტორი და ერთად გავამყაროთ სიმართლე ხალხის გამოკითხვით. დანარჩენზე დღეს საღამოს ,,ცხრიანში", - წერს ვახო სანაია.

პრემიერ-მინისტრის უწყება „მაესტროს“ ჟურნალისტს ვახო სანაიას ტენდენციურობაში ადანაშაულებს. საქმე ეხება ვახო სანაიას საავტორო გადაცემას, სადაც ერთ-ერთ თემად „ქართული ოცნების“ დაპირებები იყო. როგორც განცხადებაშია ნათქვამი, „გადაცემის მსვლელობისას, ჟურნალისტი ცდილობდა, შეექმნა სურათი, თითქოს ხელისუფლებამ არც ერთი დაპირება არ შეასრულა“.

„...ძნელია, მიუკერძოებელი ეწოდოს ტელეკომპანია ,,მაესტროს" ერთ-ერთ გადაცემას, რომელსაც ჟურნალისტი ვახო სანაია უძღვებოდა. თავის საავტორო გადაცემაში ჟურნალისტმა მაყურებელს მთავარ თემად შესთავაზა ,,ქართული ოცნების" დაპირებები, რომელთაგან გამოყო სოციალური საკითხები, სამართლიანობა, საგარეო პოლიტიკა. სიუჟეტები ატარებდა აშკარად ტენდენციურ ხასიათს. გადაცემის მსვლელობისას, ჟურნალისტი ცდილობდა, შეექმნა სურათი, თითქოს ხელისუფლებამ არც ერთი დაპირება არ შეასრულა. ამ სიცრუის გამყარებისთვის მან ქუჩაში ხალხის გამოკითხვის ხერხსაც მიმართა და ისეთი პასუხები შეარჩია, რომელიც გადაცემის მთავარ ხაზს გააძლიერებდა“, - ნათქვამია განცხადებაში.