მთავრობის კანცელარიის მიერ გავრცელებულ განცხადებას „მაესტროს“ გენერალური დირექტორი მამუკა ღლონტი „ფეისბუქზე“ ეხმაურება.

„მედია კრიტიკოსები... არადა რა მარტივია გვიჩივლონ “თავისუფალ“ სასამართლოში! პრემიები ჯანდაბას, დასაქმებულ ზონდერებზე სდუმან“, - წერს მამუკა ღლონტი.

პრემიერ-მინისტრის უწყება „მაესტროს“ ჟურნალისტს ვახო სანაიას ტენდენციურობაში ადანაშაულებს. საქმე ეხება ვახო სანაიას საავტორო გადაცემას, სადაც ერთ-ერთ თემად „ქართული ოცნების“ დაპირებები იყო. როგორც განცხადებაშია ნათქვამი, „გადაცემის მსვლელობისას, ჟურნალისტი ცდილობდა, შეექმნა სურათი, თითქოს ხელისუფლებამ არც ერთი დაპირება არ შეასრულა“.

„...ძნელია, მიუკერძოებელი ეწოდოს ტელეკომპანია ,,მაესტროს" ერთ-ერთ გადაცემას, რომელსაც ჟურნალისტი ვახო სანაია უძღვებოდა. თავის საავტორო გადაცემაში ჟურნალისტმა მაყურებელს მთავარ თემად შესთავაზა ,,ქართული ოცნების" დაპირებები, რომელთაგან გამოყო სოციალური საკითხები, სამართლიანობა, საგარეო პოლიტიკა. სიუჟეტები ატარებდა აშკარად ტენდენციურ ხასიათს. გადაცემის მსვლელობისას, ჟურნალისტი ცდილობდა, შეექმნა სურათი, თითქოს ხელისუფლებამ არც ერთი დაპირება არ შეასრულა. ამ სიცრუის გამყარებისთვის მან ქუჩაში ხალხის გამოკითხვის ხერხსაც მიმართა და ისეთი პასუხები შეარჩია, რომელიც გადაცემის მთავარ ხაზს გააძლიერებდა“, - ნათქვამია განცხადებაში.