ნატო-ს გენერალური მდივანი ანდერს ფოგ რასმუსენი, საქართველოს თავდაცვის მინისტრის ირაკლი ალასანიას წინადადებაზე პირველ კომენტარს აკეთებს.

რასმუსენის განცხადებით, საქართველოში ნატო-ს საჰაერო თავდაცვითი სისტემების განთავსება არის ალიანსის წევრი ქვეყნების გადასაწყვეტი.

”ნატო საქართველოსთან მუშაობს ნატო-საქართველოს კომისიის ფარგლებში. ეს ასევე მოიცავს პრაქტიკულ თანამშრომლობას თავდაცვის სფეროში. როდესაც საქმე მიდის უფრო კონკრეტულ საკითხებამდე, მოწყობილობების მიწოდებასა და გადაცემაზე, ეს უკვე ალიანსის ინდივიდუალური წევრების მიერ მისაღები გადაწყვეტილებაა და ისინი უნდა ჩაერთონ მოლაპარაკებებში საქართველოსთან”, - განაცხადა რასმუსენმა.

საქართველოს თავდაცვის მინისტრმა ირაკლი ალასანიამ ვაშინგტონში, ატლანტიკური საბჭოს მიერ ორგანიზებულ კონფერენციაზე სიტყვით გამოსვლისას განაცხადა, რომ დასავლეთმა უნდა გამოიყენოს შესაძლებლობა და თავად შექმნას რეალობა, შესთავაზოს ნატო-ს წევრობა ასპირანტ ქვეყნებს და განათავსოს იქ თავდაცვითი საშუალებები, განსაკუთრებით კი საქართველოში.