ნატო-ს გენერალური მდივანი ანდერს ფოგ რასმუსენი რუსეთის მხრიდან საქართველოზე მოსალოდნელ ზეწოლას არ გამორიცხავს,

ამის შესახებ რასმუსენმა ბრიუსელში გამართულ პრესკონფერენციაზე განაცხადა. მისივე თქმით ნატო თავის წევრ და მოკავშირე ქვეყნებთან ერთად მსგავსი საფრთხისთვის მზად უნდა იყოს.

”მე შეფასებას ვაკეთებ ჩვენი გამოცდილებიდან გამომდინარე. ჩვენ ვართ მოწმე რა ხერხები გამოიყენა რუსეთმა მეზობელ ქვეყნებზე, რომლებიც უახლოვდებიან ევროკავშირთან ასოცირების ხელშეკრულების ხელმოწერას. ჩვენ ეს ვნახეთ ვისლნიუსის ნოემბრის სამიტზე. ზუსტად ამიტომაც ეს არის ჩემი შეფასება, რომ ჩვენ ვნახავთ იგივეს, რადგან საქართველო და მოლდოვა ევროკავშირთან ასოცირების ხელშეკრულების ხელმოწერის პროცესს ასრულებენ. რა თქმა უნდა, ჩვენ ზუსტად არ ვიცით რა ინსტუმენტები შეიძლება გამოიყენოს რუსეთმა. ესეც, თუ გამოცდილებას და წარსულს გავიხსენებთ, შეიძლება იყოს გაზის ფასი, გაზის მიწოდება, სავაჭრო ურთიერთობები და შეზღუდვები. ეს შეიძლება იყოს დამატებითი დესტაბილიზაციის შექმნა და ამ ქვეყნებში გადაუჭრელი გაყინული კონფლიქტების გაღვივება.

მაგალითად, დნესტრისპირეთში, სამხრეთ ოსეთსა და აფხაზეთში. ასე რომ, მხოლოდ წარმოსახვას შეუძლია დაუწესოს ლიმიტები იმას, თუ რა შეუძლია რუსეთის ფედერაციას გამოიყენოს ინსტრუმენტად, როდესაც საქმე ეხება მცდელობას, ხელი შეუშალონ მათ სამეზობლოში მყოფი სახელმწიფოების ევროატლანტიკური მისწრაფებებს”, - განაცხადა რასმუსენმა.