ლაშა ტუღუში ქვორუმის არარსებობის გამო მნიშვნელოვანი კანონების ჩავარდნას სამარცხვინოდ აფასებს

პოლიტიკა - 16:04, 19 May, 2014

1523

კამპანია "ეს შენ გეხებას" წარმომადგენლებმა, არასამთავრობო ორგანიზაცია "საერთაშორისო გამჭვირვალობა – საქართველოს" აღმასრულებელმა დირექტორმა ეკა გიგაურმა, გაზეთ "რეზონანსის" მთავარმა რედაქტორმა ლაშა ტუღუშმა და სამოქალაქო განვითარების სააგენტოს (სიდა) აღმასრულებელმა დირექტორმა ზვიად დევდარიანმა ფარულ მიყურადებასთან დაკავშირებულ კანონპროექტზე პრესკონფერენცია გამართეს.

ლაშა ტუღუში ქვორუმის არარსებობის გამო ყველაზე მნიშვნელოვანი კანონების ჩავარდნას სამარცხვინოდ აფასებს.
როგორც ტუღუშმა განაცხადა, მისთვის მიუღებელია, ფარულ მიყურადებასთან დაკავშირებული ერთ-ერთი ნაწილის განხილვის ნოემბრამდე გადატანა .

"აქ ლაპარაკია, ძალიან მარტივ საკითხებზე, გვინდა ევროპული მიდგომა, თუ არ გვინდა ევროპული მიდგომა. ევროპული მიდგომაა, რომ მოსმენების გასაღები არ რჩება შინაგან საქმეთა ორგანოებს, არაევროპული მიდგომაა, რომ გასაღები რჩება შს ორგანოებს. მათ ძალიან კარგად შეეძლოთ, გაერკვიათ როგორ მუშაობს სისტემა ევროპაში. არ არის ევროპა მთვარეზე და მარსზე, ძალიან ადვილად შეიძლებოდა ამის დადგენა", - განაცხდა ტუღუშმა.

მისივე თქმით, პრობლემაა, პროცესში პერსონალური მონაცემების დაცვის ინსპექტორის მონაწილეობის საკითხიც. როგორც ლაშა ტუღუშმა განმარტა, პარლამენტმა ძალიან რბილი მექანიზმი შეიმუშავა, - " ეს მაფიქრებს, რომ მათ საერთოდ არ უნდათ კონტროლის მექანიზმის არსებობა".

"ვიღაცეებს ეს კანონი არ უნდათ, სისტემა ჯერ კიდევ არის ძველი, ხალხი არის ძველი, კანონები არის ძველი, ამიტომ ჩვენ უნდა ვიყოთ ძალიან ყურადღებით, რომ მივიღოთ ეს კანონები რაც შეიძლება სწრაფად", - აღნიშნა ტუღუშმა.

სამოქალაქო განვითარების სააგენტოს (სიდა) აღმასრულებელმა დირექტორმა ზვიად დევდარიანმა მომხდართან დაკავშირებით შესაძლო მიზეზებზე ისაუბრა. ამ კუთხით ზვიად დევდარიანმა დეპუტატების უპასუხისმგებლობა, ხელისუფლების პოლიტიკური ნების არარსებობა და აღმასრულებელი ხელისუფლების მიერ საკანონმდებლო ხელისუფლებაზე საკუთარი ბერკეტის ჩვენების მცდელობა დაასახელა.

მისივე თქმით, განხილვების შემდეგ, კამპანია "ეს შენ გეხება" მოახლოებულ არჩევნებთან დაკავშირებით კამპანიის შეჩერებას გეგმავდა, თუმცა არასამთავრობო ორგანიზაციები ახლა დამატებითი აქტივობების განხორციელებაზე ფიქრობენ.