პირველკლასელთა რეგისტრაცია იწყება

პოლიტიკა - 09:37, 20 May, 2014

1673

დღეიდან პირველკლასელთა საყოველთაო ონლაინ რეგისტრაცია იწყება. რეგისტრაციის პროცესი 20 მაისის დილის 09:00 საათზე დაიწყება და 20 ივნისს, საღამოს ცხრა საათზე დასრულდება.

პირველკლასელთა რეგისტრაცია შესაძლებელი იქნება, განათლებისა და მეცნიერების სამინისტროსა www.mes.gov.ge და განათლების მართვის საინფორმაციო სისტემის ვებგვერდზე www.registration.emis.ge; სპეციალური სარეგისტრაციო ფორმის საშუალებით.

სამინისტროს ინფორმაციით მშობელმა რეგისტრაციის ფორმაში უნდა შეიყვანოს მოსწავლის სახელი და გვარი, პირადი ნომერი, დაბადების თარიღი, მშობლის პირადი ნომერი. ასევე, ტელეფონის ნომერი, რომ რეგისტრაციის წარმატებით დასრულების შესახებ მიიღოს მოკლე ტექსტური შეტყობინება.

სისტემა არეგისტრირებს მხოლოდ იმ ბავშვებს, რომელთაც 2015 წლის პირველ იანვრამდე უსრულდებათ 6 წელი. გამონაკლისის სახით, რეგისტრირდებიან ის მოსწავლეები, რომლებიც 2013-2014 სასწავლო წელს რეგისტრირებულნი იყვნენ კერძო სკოლების მოსამზადებელ კლასებში. მოქმედი კანონმდებლობა ამ წესიდან გამონაკლისს არ ითვალისწინებს.

განათლებისა და მეცნიერების სამინისტრო თხოვნით მიმართავს მშობლებს რეგისტრაციის დაწყებამდე ყურადღებით გაეცნონ რეგისტრაციის ინსტრუქციას. გაითვალისწინონ, რომ ერთდროულად, რამდენიმე პირის მიერ, პარალელურად ან რამოდენიმეჯერ, ერთი და იმავე ბავშვის რეგისტრაციის მცდელობა დაუშვებელია, რამდენადაც სისტემა ავტომატურად შეზღუდავს რეგისტრაციას.

პირველკლასელთა რეგისტრაციის პირველ ეტაპზე რეგისტრირებული მოსწავლეების დოკუმენტების მიღება 15 მაისს დასრულდა.