,,ქართული ოცნების" მერობის კანდიდატები ფოთსა და რუსთავში შესაძლოა რეგისტრაციიდან მოიხსნან

პოლიტიკა - 11:42, 19 May, 2014

1640

არასაპარლამენტო ოპოზიცია „ქართული ოცნების" რუსთავის მერობის კანდიდატის, ხოლო საარჩევნო სუბიექტი “ჩვენი საქართველო” ასევე ,,ქართული ოცნების" ფოთის მერობის კანდიდატის რეგისტრაციიდან მოხსნას ითხოვენ.

შესაბამისი საჩივრით საარჩევნო ბლოკმა “კახა კუკავა, ფიქრია ჩიხრაძე“ და „ჩვენი საქართველომ“ ,,ქართული ოცნების" რუსთავისა და ფოთის მერობის კანდიდატების რეგისტრაციიდან მოხსნის თაობაზე ცენტრალურ საარჩევნო კომისიას უკვე მიმართეს.

მათი მოთხოვნა იმ მოტივით არის განპირობებული, რომ ფოთის მერობის კანდიდატს ირაკლი კაკულიას და რუსთავის მერობის კანდიდატს დავით ჯიქიას ბოლო ორი წლის მანძილზე მუდმივად არ უცხოვრიათ საქართველოში, რასაც საარჩევნო კოდექსი მოითხოვს.

ცესკომ აღნიშნული საჩივრის საფუძველზე წერილობით მიმართა დავით ჯიქიას, რომ მან 19 მაისს, 16:00 საათამდე წარადგინოს არჩევნების დანიშვნის დღემდე ბოლო 2 წლის მანძილზე მისი საქართველოში მუდმივად ცხოვრების დამადასტურებელი დოკუმენტაცია.

ანალოგიური მოთხოვნა გაუგზავნა ცესკომ ირაკლია კაკულიასაც. ფოთის მერობის კანდიდატმა არჩევნების დანიშვნის დღემდე ბოლო 2 წლის მანძილზე, მისი საქართველოში მუდმივად ცხოვრების დამადასტურებელი დოკუმენტაცია უნდა წარადგინოს.

ფოთის მერობის კანდიდატად ირაკლი კაკულია გუშინ, ზუგდიდში პრემიერმა ირაკლი ღარიბაშვილმა წარადგინა.

ანალოგიური ნიშნით ცესკომ სამი კვირის წინ უკვე გაუუქმა რეგისტრაცია ირაკლი ოქრუაშვილს, რომელიც გორის საოლქო საარჩევნო კომისიის მიერ, ამავე ქალაქის მერობის კანდიდატად იყრიდა კენჭს.