უვადო პატიმრობაში მყოფი გია გვიჩიანი ყოფილ პრემიერ-მინისტრს და ბიძინა ივანიშვილს მიმართავს.

გვიჩიანი ივანიშვილს მოუწოდებს, "მოქალაქის" იურისტებმა მისი საქმე შეისწავლონ.

"მოგმართავთ უდანაშაულო ადამიანი, რომელსაც სააკაშვილის რეჟიმმა რვა წლის წინ სასჯელის უმაღლესი ზომა - უვადო პატიმრობა მომისაჯა. ასეთი განაჩენის საფუძველი იყო მხოლოდ და მხოლოდ სამი ბრალდებულ-მოწმის მრავალჯერ შეცვლილი, ურთიერთგამომრიცხავი, ცრუ აღიარებითი ჩვენებებია, სადაც ორმოცამდე არსებითი წინააღმდეგობაა. ნათელია, რომ ეს "აღიარებები" მთლიანად მოგონილი და შეთხზულია, მთავარი ცრუ მოწმე ექვსჯერ ნასამართლევი, კრიმინალი და ნარკომოვაჭრეა. სამივე ცრუ მოწმეს ამ ჩვენებების სანაცვლოდ საპროცესო გარიგებებით აპატიეს სხვა მძიმე დანაშაულები (ყაჩაღობა მკვლელობით, ნარკოტიკების გასაღება) და გაათავისუფლეს. აღნიშნულ დანაშაულებრივ გამოძიებას ხელმძღვანელობდა სოდ-ის დირექტორი ერეკლე კოდუა.

მე, არც ერთ ცრუ მოწმეს არ ვიცნობდი. ამჟამად სააპელაციო სასამართლოში მიმდინარეობს საქმის გადახედვა ახლად გამოვლენილ გარემოებათა გამო. კანონის შესაბამისად, პროკურატურას არ აქვს უფლება დაუსაბუთებელი ბრალდება წარადაგინოს სასამართლოში. სამწუხაროდ, გარემოებათა გამო, მართლმსაჯულების სისტემაში, დღესაც ინერციით გრძელდება წინა ხელისუფლების დროინდელი ხარვეზები, ეს კი ნიშნავს, რომ პროკურატურა და სასამართლო მეორედ აპირებენ ჩემთვის უკანონო სამუდამო პატიმრობის მოსჯას, რაც ახალი ხელისუფლების დემოკრატიული იმიჯის შელახვას გამოიწვევს. ჩემმა ადვოკატებმა ითხოვეს შეხვედრა მთავარ პროკურორ ბატონ გიორგი ბადაშვილთან, მაგრამ სამწუხაროდ პასუხი არ მიგვიღია. ამიტომაც იძულებულები ვარ, თქვენ მოგმართოთ. გთხოვთ, თქვენს მიერ დაფუძნებული ორგანიზაცია "მოქალაქის" იურისტებმა შეისწავლონ ჩემი საქმე. გთხოვთ დაიცვათ ჩემი უფლებები და დამეხმაროთ სიმართლის პოვნაში.

წინასწარ გიხდით მადლობას", - აღნიშნულია გვიჩიანის მიმართვაში.