აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია ორდღიანი სამუშაო ვიზიტით სამეგრელოს რეგიონში იმყოფება. მთავრობის თავმჯდომარის მოვალეობის შემსრულებელი აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრ ქეთევან ბაკარაძესთან ერთად ადგილზე დაესწრო დაბა ჯვარში აფხაზეთიდან დევნილი მოსახლეობის სამედიცინო-პროფილაქტიკური გასინჯვების პროცესს. დევნილებს ადგილზე უტარდებათ ლაბორატორიული და დიაგნოსტიკური გამოკვლევები, ურიგდებათ მედიკამენტები და ჰუმანიტარული ტვირთი. სამედიცინო აქციაში მონაწილეობას იღებენ ღუდუშაურის სახელობის ეროვნული სამედიცინო ცენტრის წამყვანი სპეციალისტები.

ვახტანგ ყოლბაია იმყოფებოდა ასევე სოფელ რიყეში სამეგრელო-ზემო სვანეთის რეგიონში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელ ოთარ გოგოხიასთან ერთად, სადაც გაეცნო სოფლის მეურნეობის საპილოტე პროგრამის მიმდინარეობას. შეგახსენებთ, რომ საქართველოს ეკონომიკის სამინისტროს მიერ აფხაზეთის მთავრობას სარგებლობის უფლებით გადმოეცა სამეგრელოში 10 ჰექტარი მიწის ნაკვეთი, სადაც წელს პირველად ჩატარდა ხვნა-თესვის სამუშაოები. აღნიშნული პროექტის გეგმა საქართველოს სოფლის მეურნეობის სამინისტორსა და აფხაზეთის სოფლის მეურნეობისა და გარემოს დაცვის დეპარტამენტის თანამშრომლობით შეიქმნა. მიწის ნაკვეთის მოსარგებლეები არიან აფხაზეთიდან დევნილები და პროექტის ფარგლებში დასაქმებულია 20-ზე მეტი დევნილი ოჯახი. აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი შეხვდა აფხაზეთის სოფლის მეურნეობისა და გარემოს დაცვის დეპარტამენტის წარმომადგენლებს და პროექტის უშუალო ბენეფიციარებს, მათთან ერთად განიხილა პროექტის ეფექტურად განხორციელებისათვის აუცილებელი სამომავლო გეგმები.