გასული კვირა დეპუტატებისათვის ივნისში დანიშნული თვითმმართველობის არჩევნების გამო საგაზაფხულო სესიის დასასრული უნდა ყოფილიყო, მაგრამ საკანონმდებლო ორგანოში სავარაუდოდ მომავალ კვირას რიგგარეშე სესია ჩატარდება. მიზეზი ფარული მოსმენების შესახებ კანონია, რომელიც პირველი მოსმენით, ქვორუმის არარსებობის გამო გუშინ ვერ განიხილეს.

დეპუტატებმა სხდომაზე რეგისტრაცია სამჯერ გაიარეს, თუმცა, მათი რაოდენობა არასაკმარისი იყო. საპარლამენტო უმცირესობაში ეჭვობენ, რომ კენჭისყრის ჩავარდნა წინასწარ იყო გამიზნული და მმართველი გუნდი კანონის მიღებას განგებ აჭიანურებს.

უმრავლესობის წევრები კი არ გამორიცხავენ, რომ გაცდენების გამო დეპუტატებს სანქციები დაეკისროთ.

„მე ვფიქრობ, რომ ჯარიმის წესი უნდა გავრცელდეს ყველას მიმართ, ვინც დღეს არასაპატიოდ იყო და არა მხოლოდ დღეს, არამედ მთელი ამ თვის განმავლობაში. ძალიან ზოგადია მითითება, როცა პირი უთითებს მაგალითად ოჯახური მდგომარეობის გამო არგამოცხადებას. გაუგებარია რა არის ეს ოჯახური მდგომარეობა, დავით საყვარელიძე და გიორგი ვაშაძე უთითებენ, რომ ოჯახური მდგომარეობის გამო არ იყვნენ სხდომაზე, მაგრამ რამდენადაც მე მაქვს ინფორმაცია, უკრაინაში მიხეილ სააკაშვილთან ერთად იმყოფებიან“, - განაცხადა მანანა კობახიძემ.