“ნატო-ს სამიტზე ნებისმიერი წინ გადადგმული ნაბიჯით კმაყოფილები ვიქნებით“, - ამის შესახებ საგარეო საქმეთა მინისტრმა მაია ფანჯიკიძე, განაცხადა.

მისი თქმით, საქართველომ ძალიან დიდ პროგრესს მიაღწია როგორც თავდაცვის, ისე ბევრი სხვა მიმართულებით. როგორც ფანჯიკიძე განმარტავს, სწორედ ეს პროგრესი მოეთხოვებოდა საქართველოს ნატო-ში ინტეგრაციის გზაზე.

“აბსოლუტურად ვეთანხმები იმ გამონათქვამებს, რომელიც ნატო-ს გენერალური მდივნის მიერ ბრატისლავაში გაკეთდა. ასევე, ამერიკის ელჩის მიერ გაკეთებულ გამონათქვამებს. საქართველომ ძალიან დიდ პროგრესს მიაღწია ძალიან ბევრი მიმართულებით, მათ შორის დემოკრატიის გაძლიერების კუთხით. ეს ის პროგრესია, რომელიც საქართველოს ნატო-ში ინტეგრაციის გზაზე მოეთხოვებოდა. ეს პროცესი კიდევ უფრო ვითარდება. თუ რა ფორმით მოხდება ამ პროგრესის ასახვა, ამაზე ჩამოყალიბებული პოზიცია ჯერჯერობით არ არსებობს. სამ თვეზე მეტია, დარჩენილი ნატო-ს სამიტამდე და ამ პერიოდში მოხდება კონკრეტული ფორმის ჩამოყალიბება. ჩვენ ნებისმიერი წინ გადადგმული ნაბიჯით კმაყოფილები ვიქნებით“, - განაცხადა მაია ფანჯიკიძემ.