თბილისის საკრებულოს თავმჯდომარე ირაკლი შიხიაშვილი „ერთიან ნაციონალურ მოძრაობას“ მიმართავს. დღეს გაკეთებული განცხადებით, შიხიაშვილმა საპარლამენტო ოპოზიციის იმ ბრალდებას უპასუხა, რომლის მიხედვითაც თბილისის საკრებულომ თითქოს ამომრჩევლის მოსყიდვის მიზნით ბიუჯეტიდან თანხა გამოყო:

„მიხეილ მაჭავარიანის მიერ რამდენიმე სახელმწიფო უწყებისათვის, მათ შორის სამართალდამცავი ორგანოებისათვის მიწერილი გაუგებარი საჩივარი, რომლითაც ის საკრებულოს წინასაარჩევნოდ მოსახლეობის მოსყიდვაში ადანაშაულებს.

კერძოდ საუბარია იმაზე, რომ საკრებულომ 14 აპრილს ეკლესია-მონასტრებისათვის, ინფრასტრუქტურის გაუმჯობესებისათვის გამოყო თანხები ბიუჯეტში და თითქოს ეს არის მოსახლეობის მოსყიდვა.

მსურს განვუმარტო საზოგადოებას, რომ საკრებულო თანხებს არ განკარგავს. ეს მერიის პრეროგატივაა, თბილისის საკრებულომ, რომელმაც ბიუჯეტი ახალი რეგულაციებით არა 14 აპრილს, არამედ 7 მარტს დაამტკიცა, კეთილმოწყობის მუხლში, თბილისის ტერიტორიაზე არსებული ეკლესია-მონასტრებისათვის დასახმარებელი თანხაც გაითვალისწინა.

იმისათვის, რომ რომელიმე პოლიტიკურ ორგანიზაციას და მათ შორის ნაციონალურ მოძრაობას მანიპულირების საშუალება არ მისცემოდა, საკრებულოს ბიურომ მერიას რეკომენდაციის სახით შესთავაზა ბიუჯეტში უკვე არსებული ფულადი სახსრების სამართლიანი განაწილების წესი ტაძრების ინფრასტრუქტურის მოწესრიგებისთვის, მაქსიმალური ზღვრული ოდენობით 10 ათასი ლარი.

აღსანიშნავია, რომ გადაწყვეტილებას თბილისის საკრებულოს ბიუროს წევრთა აბსოლუტურმა უმრავლესობამ, მათ შორის ნაციონალური მძრაობის წარმომადგენლებმა დაუჭირეს მხარი, ამის მიუხედავად „ნაციონალური მოძრაობა“ და მისი ლიდერი მიხეილ მაჭავარიანი ცდილობენ, მისთვის ჩვეული, ბინძური პიარ-კამპანიის აგორებას და ამ თემის პოლემიკის საგნად ქცევას.

„ნაციონალურმა მოძრაობამ“ კიდევ ერთხელ წარმოაჩინა თავი მებრძოლ ათეისტად, ლიდერები მიხეილ მაჭავარიანის მეთაურობით, ერთმანეთში შეგნებულად ურევენ ეკლესიის დახმარებას წინასაარჩევნოდ ამომრჩევლის მოსყიდვაში“, - განაცხადა ირაკლი შიხიაშვილმა.