ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის ალექსი პეტრიაშვილი ბრატისლავაში გლობალური უსაფრთხოების ფორუმზე ნატო-ს გენერალური მდივნის მიერ გაკეთებულ განცხადებას ეხმაურება. პეტრიაშვილი „ფეისბუქზე“ წერს, რომ აღნიშნულ ფორუმზე საქართველოს თემამ მნიშვნელოვანი ადგილი დაიკავა. მინისტრი ანდერს ფოგ რასმუსენის განცხადებაზე დაყრდნობით იმედოვნებს, რომ უელსის სამიტზე საქართველო „რაღაც კარგს გამოაცხობს“.

„უელსში უეჭველი რაღაც კარგს გამოვაცხობთ! ბრატისლავაში გლობალური უსაფრთხოების ფორუმზე ნატოს გენ. მდივანმა უაღრესად წარმატებული უწოდა საქართველოში მიმდინარე რეფორმებს, მადლიერება გამოხატა ჩვენი შეიარაღებული ძალებისადმი ავღანეთის ოპერაციაში მონაწილეობისთვის და გამოთქვა ღრმა რწმენა, რომ საქართველოს მიერ მიღწეული წარმატებები აუცილებლად აისახება ნატოს უელსის სამიტის გადაწყვეტილებებში ხელშესახები მნიშვნელოვანი პროგრესის დემონსტრირებით. მომდევნო სესიაზე იგივე დაადასტურეს ლიტვის საგარეო საქმეთა მინისტრმა, აშშ-ს გენერალმა ალენმა, აგრეთვე, ფრანგმა და ბრიტანელმა მაღალი რანგის დიპლომატებმა. საქართველოს თემამ მნიშვნელოვანი ადგილი დაიკავა დღის პირველ ნახევარში გამართულ დისკუსიებში, რომელშიც თქვენმა მონა-მორჩილმაც მიიღო მონაწილეობა“, - წერს პეტრიაშვილი.

ბრატისლავაში გლობალური უსაფრთხოების ყოველწლიურ ფორუმზე ნატო-ს გენერალური მდივანმა ანდერს ფოგ რასმუსენმა საქართველოზე ისაუბრა. რასმუსენს კითხვა დაუსვეს იმასთან დაკავშირებით, შესაძლებელია, თუ არა საქართველომ სექტემბერში მაპი მიიღოს. ნატოს გენ მდივანმა კითხვის საპასუხოდ საქართველოს აღმასვლაზე ვრცლად ისაუბრა.