ფარულ მოსმენებთან დაკავშირებული კანონპროექტის ერთ-ერთმა ავტორმა, გაზეთ "რეზონანსის" მთავარმა რედაქტორმა ლაშა ტუღუშმა პარლამენტის იურიდიული კომიტეტის გუშინდელ სხდომაზე განაცხადა, რომ პერსონალურ მონაცემებზე წვდომის გასაღები მობილურ კომპანიებს უნდა ჰქონდეთ.

"მე მხარს ვუჭერ კანონპროექტის იმ ვარიანტს, რომელშიც გათვალისწინებული იყო, რომ გასაღები უნდა ჰქონოდა მობილურ კომპანიებს. თუ ვთვლით, რომ ევროკავშირის პრაქტიკაა საუკეთესო და ამ ორგანიზაციის წევრი ქვეყნების გამოცდილებას შევხედავთ, აღმოვაჩენთ, რომ ევროკავშირის თითქმის ყველა ქვეყანაში, გასაღები მობილურ კომპანიებს აქვთ. გარდა ამისა, ყველა ექსპერტი, რომელიც ჩამოვიდა თუ არ ჩამოვიდა, ამბობს, რომ კარგი პრაქტიკაა, როცა გასაღები არის მობილურ კომპანიებში. ევროპაში, სადაც განსხვავებული პრაქტიკაა, ეს მიიჩნევა ხარვეზიან პრაქტიკად", - აღნიშნა ტუღუშმა.