მარტივი დასკვნა - ვინ უნდა მოაწეროს ხელი საქართველოს ევროპასთან ასოცირების ხელშეკრულებას

საქართველოს კონსტიტუციის 73-ე მუხლის 1 პუნქტის ,,ა" ქვეპუნქტის შესაბამისად, საქართველოს პრეზიდენტი მთავრობასთან შეთანხმებით აწარმოებს მოლაპარაკებებს სხვა სახელმწიფოებთან და საერთაშორისო ორგანიზაციებთან, დებს საერთაშორისო ხელშეკრულებებსა და შეთანხმებებს.

კონსტიტუციის 78-ე მუხლის მე-4 პუნქტის თანახმად, პრემიერ-მინისტრი და მინისტრები საგარეო ურთიერთობებში წარმოადგენენ საქართველოს თავიანთი კომპეტენციის ფარგლებში.

მთავრობის სტრუქტურის, უფლებამოსილებისა და საქმიანობის წესის შესახებ კანონის მე-5 მუხლის ,,ფ'' ქვეპუნქტის შესაბამისად, საქართველოს მთავრობა ითანხმებს სხვა სახელმწიფოებთან და საერთაშორისო ორგანიზაციებთან მოლაპარაკებების წარმოების, აგრეთვე საქართველოს საერთაშორისო ხელშეკრულებებისა და შეთანხმებების დადების საკითხებს და უზრუნველყოფს საქართველოს საერთაშორისო ხელშეკრულებებით აღებულ ვალდებულებათა შესრულებას.

ამავე კანონის მე-8 მუხლის მე-2 პუნქტის ,,ლ" ქვეპუნქტის თანახმად, საქართველოს პრემიერ-მინისტრი წარმოადგენს მთავრობას სხვა სახელმწიფო დაწესებულებებთან და საერთაშორისო ორგანიზაციებთან ურთიერთობაში.

მე-11-1 მუხლის მე-2 პუნქტის შესაბამისად, პრემიერ-მინისტრსა და საქართველოს საგარეო საქმეთა მინისტრს უფლება აქვთ, შეასრულონ საქართველოს საერთაშორისო ხელშეკრულების დადებასთან დაკავშირებული ყველა მოქმედება უფლებამოსილების წარდგენის გარეშე.

მოცემული ნორმების მარტივი ანალიზის შედეგად, ასევე მარტივად მივდივართ დასკვნამდე, რომ საქართველოს ევროკავშირთან ასოცირების ხელშეკრულებას ხელი უნდა მოაწეროს საქართველოს პრეზიდენტმა.

ირაკლი კობიძე

,,რეფორმატორთა კლუბი"