კულტურის სამინისტრო იაკობ გოგებაშვილის სახლ-მუზეუმში მომხდარ ფაქტს გამოეხმაურა

პოლიტიკა - 20:22, 14 May, 2014

2244

საქართველოს კულტურისა და ძეგლთა დაცვის სამინისტროს ერთ-ერთ სსიპ-ში - ვარიანის იაკობ გოგებაშვილის სახლ-მუზეუმში სამწუხარო ფაქტი მოხდა.

მუზეუმის მეორე სართულის მოაჯირი გადავარდა, რის შედეგადაც სამი ქალბატონი დაშავდა.

ქალბატონები ექსკურსიაზე მყოფი თბილისის ერთ-ერთი საშუალო სკოლის მოსწავლეების მშობლები აღმოჩნდნენ. ორი მათგანი მსუბუქად დაზიანდა, მესამის მდგომარეობა კი შედარებით მძიმეა.

კულტურისა და ძეგლთა დაცვის სამინისტროს ფინანსური მხარდაჭერით სახლ-მუზეუმის შენობას ახლახან ჩაუტარდა რეაბილიტაცია, ამიტომ 14 მაისს ვითარების გასარკვევად შემთხვევის ადგილს კულტურის მინისტრის, გურამ ოდიშარიას დავალებით მინისტრის მოადგილე ბადრი ბაგრატიონ-გრუზინსკი ეწვია.

აღმოჩნდა, რომ მომხდარზე სისხლის სამართლის საქმეა აღძრული და შემთხვევას შიდა ქართლის სამხარეო პოლიცია იძიებს.

კულტურისა და ძეგლთა დაცვის სამინისტრო მომხდარის გამო მწუხარებას გამოთქვამს, დაშავებულებს მალე გამოჯანმრთელებას უსურვებს და იმედოვნებს, რომ სამართალდამცავები საქმეს დროულად და ობიექტურად გამოიძიებენ.

ვარიანის იაკობ გოგებაშვილის სახლ-მუზეუმში სამწუხარო ფაქტი ორი დღის წინ მოხდა.