ღვინიაშვილი ჭიკაიძეს:თავმოყვარეობის ამბავი აიყო შინაგან საქმეთა მინისტრი და გარკვეული ჯგუფი გისმენდეს

პოლიტიკა - 14:46, 14 May, 2014

1573

პარტია "ერთიანი ნაციონალური მოძრაობა" შინაგან საქმეთა მინისტრს ალექსანდრე ჭიკაიძეს კვლავ პარლამენტში იბარებს.

პარლამენტის პლენარულ სხდომაზე დეპუტატმა გიორგი ღვინიაშვილმა იმ საკითხებზე ისაუბრა, რაზეც უმცირესობას შს მინისტრისგან პასუხების მიღება სურს.

"კრიმინოგენულ მდგომარეობასთან დაკავშირებით შს სამინისტროს მიერ წარმოდგენილი სტატისტიკა ძალიან ჰგავს შევარდანაძისდროინდელ სტატისტიკას. ყველაზე კარგი სტატისტი ქვეყნის მოსახლეობაა, რომლის 1/3 ამბობს, რომ ქვეყანაში კრიმინალი გაზრდილია. ეს ყველაზე კარგად მოსახლეობამ იცის, რადგან კრიმინალი მათ თვალწინ ხდება და მათ კისერზე გადადის. ამ ყველაფრის ფონზე, როცა შს სამინისტრო კრიმინალის შემცირებაზე უნდა მუშაობდეს, შს მინისტრი აკეთებს აბსურდულ, დაუსაბუთებელ და ფანტასმაგორიულ განცხადებას, რომ თითქოს "ნაციონალური მოძრაობის" წევრები დაკავებული არიან საბურავების შეძენით, ინსტრუქტაჟის მისაღებად კიევის ევრომაიდნის აქტივისტების ჩამოყვანით, რათა ქვეყანაში დესტაბილიზაცია მოვაწყოთ", - განაცხადა ღვინიაშვილმა.

დეპუტატი უპასუხისმგებლოს უწოდებს ჭიკაიძის იმ განცხადებას, სადაც მინისტრი ამბობს, რომ მისი უწყებიდან მოპარულია მოსასმენი აპარატურა, რითიც ხელისუფლება ოპოზიციას უსმენს.

"ჯერ ერთი, შინაგან საქმეთა მინისტრმა არ უნდა იკადრო, რომ მოსახლეობა მოატყუო. ხალხი ისეთი მიამიტი არ არის, რომ ეს დაიჯეროს. მეორეც თავმოყვარეობის ამბავია, იყო შინაგან საქმეთა მინისტრი, ხელისუფლებაში იყო წელიწადი და შვიდი თვე და გარკვეული ჯგუფი გისმენდეს. გარდა ამისა, შინაგან საქმეთა მინისტრის განცხადებით, თურმე საჩხერეში ადამიანებს იმიტომ იტაცებენ, რომ ვერ არკვევენ, სად გადის ზოლი და მათი ბრალი ყოფილა. ასევე აცხადებს, რომ არ არის კომპეტენტური და არ იცის, სჭირდება თუ არა საქართველოს ნატო-ს თავდაცვითი სისტემა. აქედან გამომდინარე, ძალიან ბევრი კითხვა იბადება ამ ადამიანის მიმართ", - აღნიშნა გიორგი ღვიანიაშვილმა.