პარლამენტის ადამიანის უფლებათა დაცვის კომიტეტის თავმჯდომარემ, ეკა ბესელიამ პარლამენტის პლენარულ სხდომაზე, ფარული ჩანაწერების კომენტირებისას განაცხადა, რომ „სირაქლემას პოზიციაში ყოფნას არავინ აპირებს“:

"რაც შეეხება ამ მოსმენების ფაქტს, ჩვენ ვთქვით, რომ გამოძიება უნდა ჩატარდეს. ჩვენ არ გვითქვამს, რომ ეს არაფერს ნიშნავს, განსხვავებით იმ გუნდისაგან, რომელიც უყურებდა იმ ჩანაწერებს, რომელიც არჩევნების წინ გავრცელდა და როდესაც ითქვა, რომ თურმე ბიძინა ივანიშვილმა დაავალა ამ ჩანაწერების განხორციელება დაცვის თანამშრომელს და მერე გაირკვა, რომ ეს ყველაფერი იგეგმებოდა იმ შინაგან საქმეთა სამინისტროში. ასევე, გვახსოვს ძალიან კარგად ციხეში მძევლად მყოფ თამაზაშვილს, რომ აბრალებდით და ადეიშვილი თხზავდა ამ ისტორიას. გვახსოვს ბევრის სხვა რამ, იგივე კადრები, რომლებიც სამალავებიდან ამოვიდა, სამალავებში არ რჩება, ბევრი რამ ზემოთაც ამოდის და ვნახეთ ის შემზარავი კადრები, როგორ აწამებდნენ ადამიანებს. ამას გამოძიება სჭირდება, ეს არის პრინციპული პოზიცია. ერთი კვირაა ზუსტად, რაც გამოძიება დაიწყო, 7 მაისს და არ ვიცი დედამიწაზე საგამოძიებო უწყება, რომელიც ერთ კვირაში იწყებს და ამთავრებს ასეთ ძალიან მნიშვნელოვან საქმეს. ჩვენ გამოძიებას დაველოდებით, თქვენგან განსხვავებით, სირაქლემას პოზიციაში ყოფნას არავინ აპირებს და თქვენგან განსხვავებით, არავინ აპირებს, თავლი დახუჭოს და ვინც ეს ჩაიდინა, პასუხს აგებს უდავოდ, ამაში დარწმუნებული ვარ", - განაცხადა ეკა ბესელიამ.