საქართველოში ვიზიტად მყოფმა ევროპული საბჭოს პრეზიდენტმა , ჰერმან ვან რომპეიმ "ევროპულ სახლში" საჯარო ლექციაზე განაცხადა, რომ საქართველოს წინაშე ბევრი გამოწვევაა.

მისი თქმით, 2014 წელი ძალიან მნიშვნელოვანი წელია საქართველოსთვის და ქვეყანას ძალიან მნიშვნელოვანი პროგრესი ექნება.

"თქვენ გექნებათ პოლიტიკური და ეკონომიკური ასოცირება ევროგაერთიანებასთან. საქართველოს წინაშე ბევრი გამოწვევაა, მაგრამ ჩვენ თქვენ გვერდით ვიქნებით.

პოტენციური სარგებელი ჩვენი კავშირების გამყარების არის უზარმაზარი, მაგრამ ამ წარმატების მისაღწევად ბევრი მუშაობაა საჭირო. დარწმუნებული ვარ, რომ საქართველო ამას შეძლებს თავისი მოსახლეობის, მომავალი თაობების სასიკეთოდ.

ასოცირების ხელშეკრულება ბევრად მეტია, ვიდრე ვაჭრობის თაობაზე ხელშეკრულება. ეს შეეხება ფასეულობებსაც და ჩვენ შესაბამისად, კარგად უნდა გავაცნობიეროთ ასოცირების ხელშეკრულების სული. გვინდა, რომ ინტიტუციები იყოს ფუნქციონალური, უნდა იყოს კანონის უზენაესობა, დაცული იყოს უდანაშაულობის პრეზუმფცია, ასევე ნორმალური ურთიერთობები ოპოზიციასა და ხელისუფლებას შორის. ეს ყველაფერი ქვეყანაში დემოკრატიის განვითარებას შეუწყობს ხელს", - განაცხადა ჰერმან ვან რომპეიმ.