საგარეო საქმეთა მინისტრის ინფორმაციით, უახლოეს დღეებში გახდება ცნობილი თუ როგორ დაკომპლექტდება დელეგაცია, რომელიც ასოცირების შეთანხმებაზე ხელის მოწერის ცერემონიაზე გაემგზავრება. მაია ფანჯიკიძის თქმით, ჯერ უცნობია იქნება თუ არა დელეგაციის შემადგენლობაში საქართველოს პრეზიდენტი, გიორგი მარგველაშვილი.

"ვერ გეტყვით. ჩვენ ჯერ ასეთ საკითხებზე ლაპარაკი არ გვქონია. 27 ივნისი რომ დაკონკრეტდა, ეს არის დღევანდელი დღის ყველაზე მნიშვნელოვანი ახალი ამბავი. ჩვენ ვიცით, იქითა მხრიდან, რომ იქნება 28 წევრი ქვეყნის სახელმწიფოს და მთავრობის მეთაური. ჩვენი დელეგაცია როგორ დაკომპლექტება, ეს ალბათ გაირკვევა უახლოეს მომავალში", - განაცხადა მაია ფანჯიკიძემ.

ის ასევე არ აკონკრეტებს, თუ ვინ მოაწერს ხელშეკრულებას ხელს ქართული მხრიდან.

"ასოცირების ხელშეკრულებას ხელი მოეწერება 27 ივნისს, ხელმოწერა შედგება ბრიუსელში. ჩვენი მხრიდან ვინ მოაწერს ხელს? - პრემიერმა როგორც აღნიშნა, ეს იქნება საქართველო, ამიტომ მე ამას ვერაფერს დავამატებ", - დასძინა ფანჯიკიძემ.