საქართველოს პრემიერ–მინისტრ ირაკლი ღარიბაშვილისა და ევროპული საბჭოს პრეზიდენტის ჰერმან ვან რომპუის პირისპირი შეხვედრის დასრულების შემდეგ, გაიმართა გაფართოებული ფორმატის შეხვედრა. მხარეებმა ევროკავშირთან ასოცირების შეთანხმების ხელმოწერის პერსპექტივებზე ისაუბრეს. საქართველოს პრემიერ–მინისტრმა ევროპული საბჭოს პრეზიდენტს საქართველოში მიმდინარე რეფორმების შესახებ ინფორმაცია მიაწოდა. მისი განცხადებით, საქართველოს ხელისუფლება მზად არის გააქტიუროს რეფორმების პროცესი, რათა მომზადდეს მტკიცე საფუძველი ევროკავშირთან ასოცირების შესახებ შეთანხმების ეფექტიანი განხორციელებისთვის.

შეხვედრაზე კმაყოფილებით აღინიშნა,რომ ივნისის თვეში საქართველოს ევროკომისიის პრეზიდენტი ჟოზე მანუელ ბაროზო ეწვევა, რომლის ვიზიტის ფარგლებში გაიმართება საერთაშორისო საინვესტიციო კონფერენცია. გამოითქვა იმედი, რომ აღნიშნული კონფერენცია ხელს შეუწყობს საქართველოს ევროატლანტიკურ სტრუქტურებში ინტეგრაციის პროცესს.

საქართველოს პრემიერ–მინისტრის შეხვედრას დაესწრნენ: ევროპული საბჭოს პრეზიდენტთან ევროკავშირის საგარეო განყოფილების ხელმძღვანელი ევროპასა და ცენტრალურ აზიაში ლუის ფილიპე ფერნანდეზ დე ლა პენია, ევროპის საბჭოს პრეზიდენტის მთავარი მრჩეველი საგარეო საკითხებში პედრო სერრანო, ევროპის საბჭოს პრეზიდენტის კაბინეტის წევრი შარლოტ სამელინი, ევროპის საბჭოს პრეზიდენტის კაბინეტის წევრი ლუუკლ ვან მიდელაარი, ევროპის საბჭოს პრეზიდენტის სპიკერი პრებენ აამანი, ევროკავშირის წარმომადგენლობის ხელმძღვანელი საქართველოში ფილიფ დიმიტროვი, საქართველოში ევროკავშირის დელეგაციის პოლიტიკური განყოფილების ხელმძღვანელი ტობიას ტაიბერგი, საქართველოს საგარეო საქმეთა მინისტრი მაია ფანჯიკიძე, საქართველოს სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილი, ევროკავშირთან საქართველოს მისიის ხელმძღვანელი ნატალია საბანაძე, საქართველოს საგარეო საქმეთა მინისტრის მოადგილე თამარ ბერუჩაშვილი, საქართველოს მთავრობის კანცელარიის უფროსის მოადგილე ნინო კობახიძე.