შავგულიძე: ფარული მოსმენების კანონპროექტზე პრემიერს სრულყოფილი ინფორმაცია არ ჰქონდა

პოლიტიკა - 22:07, 13 May, 2014

1715

საპარლამენტო უმრავლესობის წევრი შალვა შავგულიძე, პრემიერის იმ განცხადებას ეხმაურება, რომელიც ირაკლი ღარიბაშვილმა ფარული მიყურადების შესახებ კანონპროექტზე განაცხადა.

„ჩემი აზრით ამ შემთხვევაში ადგილი ჰქონდა ცოტა არასწორ ინტერპრეტაციას პრემიერის გამონათქვამის, ან მას არ ჰქონდა სრულყოფილი ინფორმაცია მიწოდებული“,- განაცხადა შალვა შავგულიძემ „რუსთავი 2“-ზე გადაცემა „არჩევანის“ ეთერში.

პრემიერ ირაკლი ღარიბაშვილის განცხადებით, კანონპროექტის ვარიანტი, რაც არასამთავრობოებმა და „ნაციონალური მოძრაობის“ წარმომადგენლებმა პარლამენტში წარმოადგინეს კატასტროფის ტოლფასია.

შეგახსენებთ, რომ ფარულ მიყურადებასა და თვალთვალთან დაკავშირებით პარლამენტში შესულია და განიხილება მხოლოდ ერთი საკანონმდებლო პაკეტი, რომლის ავტორებიც არიან, იურიდიულ საკითხთა კომიტეტის თავმჯდომარის პირველი მოადგილე და კოალიცია „ქართული ოცნების“ წევრი შალვა შავგულიძე, ამავე კომიტეტის მთავარი სპეციალისტი ლიკა საჯაია, გაზეთ „რეზონანსის“ მთავარი რედაქტორი ლაშა ტუღუში და ჟურნალისტი ზვიად ქორიძე.

კანონპროექტი პარლამენტში გასული წლის ივლისში დარეგისტრირდა.