“საფრანგეთი და საქართველო თავიანთი მდგომარეობიდან გამომდინარე, ერთ დიაპაზონზე არ დგანან, მაგრამ ერთი და იგივე მოთხოვნილებები აქვთ“,- ამის შესახებ საფრანგეთის პრეზიდენტმა საქართველო–საფრანგეთის ეკონომიკურ ფორუმზე სიტყვით გამოსვლისას განაცხადა.

მისი თქმით, ეკონომიკის განვითარების კუთხით, საქართველოს და საფრანგეთს ერთად ბევრი აქვს გასაკეთებელი.

„ჩემს ვიზიტს საქართველოში ამ ეკონომიკური ფორუმით ვიწყებ, რათა კიდევ ერთხელ მხარი დავუჭირო და მოვითხოვო, რაც გვაქვს ერთობლივად გასაკეთებელი. რა თქმა უნდა, პოლიტიკური კონტექსტის გარდა, კიდევ ერთი მთავარი პრიორიტეტი, რომელიც ჩვენი მხრიდან დიდ პასუხისმგებლობას მოითხოვს, გამოვხატოთ ჩვენი სოლიდარობა. ჩვენი პრიორიტეტია, ხელი შევუწყოთ საქართველოს განვითარებას და სტიმული მივცეთ ჩვენი ორმხრივი ეკონომიკური ურთიერთობების განვითარებას. საფრანგეთისა და საქართველოს მდგომარეობიდან გამომდინარე, შეიძლება, ითქვას, რომ ერთ დიაპაზონზე არ ვართ, მაგრამ ერთი და იგივე მოთხოვნილებები გაგვაჩნია – გავიზიაროთ ტექნოლოგიები, ცოდნა, მეტი სავაჭრო ურთიერთობები ჰქონდეთ ჩვენს ქვეყნებს. შეიძლება, ითქვას, რომ მრავალი წელია და ბოლო ორი წელი განსაკუთრებით საქართველომ აღმასვლა დაიწყო. იზრდება მშენებლობები, პროექტების რაოდენობა, ინფრასტრუქტურის განახლება. პროგრესის გზით მიდის სავაჭრო გაცვლებიც. ქართული ექსპორტიც გაიზარდა, რაც მოწმობს იმას, რომ ურთიერთდინამიკა მაღალია. ჩვენ არ ვართ ისეთი ურთიერთობების დონეზე, რომ ჩვენ ფრანგები ჩამოვდივართ, გთავაზობთ პროდუქციას და სანაცვლოდ არაფერს ვიღებთ და არანაირი სარგებელი არ გვაქვს. სიტუაცია ასეთი სულაც არ არის და როცა მე ამ პროგრესს ვუყურებ, უფრო და უფრო ვრწმუნები, რომ მეტი გასაკეთებელი გვაქვს ერთად“,– განაცხადა ფრანსუა ოლანდმა.