საქართველოს იუსტიციის მინისტრი თეა წულუკიანი ელოდება, რომ ფრანგული კომპანიები საქართველოთი დაინტერესდებიან.

მინისტრის თქმით, ფრანგი ბიზნესმენების ჩამოსვლა საქართველოში და აქ წარმოების დაწყება, ხელს შეუწყობს ფრანგული ინვესტიციების ქვეყანაში განვითარებას.

თეა წულუკიანმა იმ ბიზნესგარემოზეც ისაუბრა, რომელიც საქართველოშია და აღნიშნა, რომ საქართველოში საწარმოს დარეგისტრირება ძალიან მარტივია.

მისივე თქმით, იუსტიციის სამინისტრო, საგარეო საქმეთა სამინისტროსთან ერთად, უახლოეს პერიოდში გეგმავს ჰააგის კონვენციის რატიფიცირებას, რაც ბიზნესდავების საერთაშორისო არბიტრაჟის ფარგლებში გადაწყვეტას უკავშირდება.

წულუკიანმა ასევე ისაუბრა ერთი ფანჯრის პრინციპზე, რომელიც იუსტიციის სამინისტროში მოქმედებს და რომელიც ბიზნესსაწარმოების დარეგისტრირებას ძალიან მარტივს ხდის.

"პატარა საწარმოს დარეგისტრირება, შესაძლებელია 8-10 საათში. ხოლო დიდი საწარმოს, 24 საათში. გადასახადი არის ძალიან დაბალი. ჩვენ შეგვიძლია თვეში დავარეგისტრიროთ 300-მდე კომპანია, ვცდილობთ, ეს სისტემა გამჭვირვალე იყოს. საქართველო ბიზნესის კეთების სიმარტივის კუთხით მსოფლიოში მერვე ადგილზეა და ჩვენ ამით ვამაყობთ," - განაცხადა თეა წულუკიანმა საქართველო-საფრანგეთის ბიზნესფორუმზე სიტყვით გამოსვლისას.