გიორგი კვირიკაშვილმა საქართველო- საფრანგეთის ბიზნეს-ფორუმი გახსნა

პოლიტიკა - 15:46, 13 May, 2014

1214

ფორუმს საფრანგეთის რესპუბლიკის ელჩი საქართველოში რენო სალესი, საქართველოს სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილი, საქართველოს ეროვნული საინვესტიციო სააგენტოს დირექტორი გიორგი პერტაია, ასევე საქართველოდან და საფრანგეთიდან სამასზე მეტი საჯარო და კერძო სექტორის წარმომადგენელი ესწრებოდნენ.

ეკონომიკური ფორუმზე საქართველოს სოფლის მეურნეობის, ტურიზმის, ენერგეტიკის, ტრანსპორტისა და ლოგისტიკის სფეროებში არსებული მდგომარეობა განიხილეს და იმ საინვესტიციო მიმართულებებზე ისაუბრეს, რომლებიც მნიშვნელოვანია საქართველოსა და საფრანგეთის ეკონომიკური თანამშრომლობისთვის. ფორუმის ფარგლებში ფრანგული და ქართული კომპანიების წარმომადგენლებმა ორმხრივი შეხვედრებიც გამართეს და სამომავლო ურთიერთობებზე ისაუბრეს.
ბიზნეს-ფორუმზე სიტყვით გამოსვლისას, საქართველოს ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა ფრანგულ მხარეს 2008 წელს საქართველოში კონფლიქტის შეჩერებისა და ქვეყნის სუვერენიტეტის შენარჩუნებაში დახმარებისთვის მადლობა გადაუხადა. მინისტრის განცხადებით, ევროკავშირთან ასოცირების ხელშეკრულების გაფორმების შემდეგ ევროპული ბიზნესისთვის საქართველო პოსტსაბჭოთა ქვეყნად აღარ იქნება აღქმული.
"პრეზიდენტ ოლანდის ვიზიტი, პირველ რიგში, პოლიტიკურად ძალიან მნიშვნელოვანია საქართველოსთვის. ეს არის დიდი მხარდაჭერა ჩვენთვის ევროინტეგრაციის გზაზე. ამ ვიზიტს აუცილებლად მოჰყვება კონკრეტული შედეგები. დღეს ძალიან მნიშვნელოვანი ბიზნეს-ფორუმი იმართება, სადაც იქნება უმაღლესი დონის შეხვედრები, მათ შორის პრემიერ-მინისტრთან. საფრანგეთთან ჩვენ გვაქვს ძალიან მნიშვნელოვანი თანამშრომლობა, განსაკუთრებით ინფრასტრუქტურის მიმართულებით. ასევე, საინვესტიციო-საბანკო სფეროში გეგმავენ სხვა კომპანიებიც შემოსვლას და ვფიქრობ, რომ ძალიან კარგი შედეგი გვექნება", - განაცხადა გიორგი კვირიკაშვილმა.
საქართველო-საფრანგეთის ეკონომიკური ფორუმი საქართველოს ეროვნული საინვესტიციო სააგენტოს, საქართველოში საფრანგეთის რესპუბლიკის საელჩოს, საფრანგეთი-საქართველოს სავაჭრო და სამრეწველო პალატისა და საქართველოს თანაინვესტირების ფონდის ერთობლივი ორგანიზებით გაიმართა.