ამჟამად 60-70 ადგილობრივი მკვიდრი მუშაობს საპარტნიორო ფონდის და ყაზახური კომპანიის “ყაზმუნაიგაზ-სერვისის“ ერთობლივი პროექტის - ლიკანში ხუთვარსკვლავიანი სასტუმრო-გამაჯანსაღებელი კომპლექსის სამშენებლო სამუშაოებზე. როგორც საპარტნიორო ფონდში აცხადებენ, ზაფხულში კომპლექსის შიდა აღჭურვის სამუშაოების აქტიურ ფაზაში გადასვლის შემდეგ დასაქმებულთა რიცხვი 150 კაცამდე გაიზრდება.

„სამშენებლო სამუშაოები დასასრულს მიუახლოვდა და ახლა უკვე თურქული კომპანია „დეკონი,“ ჩაერთო პროექტში. იგი უზრუნველყოფს სასტუმროს თანამედროვე ტექნიკით, ავეჯით და სხვა აუცილებელი ელემენტებით აღჭურვას,“ აცხადებს საპარტნიორო ფონდის აღმასრულებელი დირექტორი ირაკლი კოვზანაძე.

152 ნომრიანი RIXOS-ის სასტუმრო კომპლექსი ლიკანში (ბორჯომი) ყოფილი IV სამმართველოს ტერიტორიაზე შენდება. კომპლექსი ითვალისწინებს მიმდებარე ტერიტორიის - გზების, პარკინგის, გასართობი ცენტრის და კომპლექსის სხვა დამხმარე ნაგებობების რეაბილიტაციასაც.

კომპლექსის მთლიანი საინვესტიციო მოცულობა: 38,5 მლნ. აშშ დოლარია. ფონდის თანამონაწილეობა პროექტში კაპიტალის 50%-ია. სასტუმროს ოპერირებას მსოფლიოში ცნობილი ოპერატორი RIXOS განახორციელებს. სასტუმრო ექსპლუატაციაში 2014 წლის ბოლომდე შევა.