პრემიერმა გორში ,,წინა ხელისუფლების გაუაზრებელ და უგუნურ პოლიტიკზე" ისაუბრა

პოლიტიკა - 17:25, 12 May, 2014

1711

საქართველოს პრემიერის ირაკლი ღარიბაშვილის თქმით, ის რომ საქართველო ომში ჩათრეული აღმოჩნდა და დღეს საქართველოს ტერიტორიები დროებით დაკარგული და ოკუპირებულია, წინა ხელისუფლების გაუაზრებელი და უგუნური პოლიტიკის შედეგია.

ამის შესახებ ირაკლი ღარიბაშვილმა გორის მოსახლეობის წინაშე სიტყვით გამოსვლისას განაცხადა.

მან ადგილობრივებს ანდრია პირველწოდებულის ხსენების დღე მიულოცა და მშვიდობა უსურვა.

"სამშობლოს ერთგულებაში ქართლელებს ტოლი არ გყავთ. მშვიდობა ტყუილად არ ვახსენე. სულ ცოტა ხნის წინ თქვენ თქვენს თავზე გამოსცადეთ ის საშინელება, რასაც ჰქვია აგვისტოს ომი, რომლის იარებიც ჯერაც არ მოშუშებულა. ის, რომ საქართველო ამ ომში აღმოჩნდა ჩათრეული და ჩვენი ტერიტორიები დღეს არის დროებით დაკარგული და ოკუპირებული, ის, რომ საკუთარ სამშობლოში დევნილად იქცა ათასობით ადამიანი, წინა ხელისუფლების გაუაზრებელი და უგუნური პოლიტიკის შედეგია. ჩვენ ვცდილობთ, გაწონასწორებული და კარგად გათვლილი ნაბიჯებით, ყველა საერთაშორისო ბერკეტის გამოყენებით დავძლიოთ ომის უმძიმესი შედეგები", - აღნიშნა ღარიბაშვილმა.

პრემიერი განსაკუთრებით მიესალმა დევნილებს და ისაუბრა იმის შესახებ, რომ გორის მიმდებარე სოფლებში მოსახლეობა დღესაც დიდი საფრთხის ქვეშ ცხოვრობს.

"ჩვენი მთავრობა ყველაფერს აკეთებს იმისთვის, რომ შეგიმსუბუქოთ ტკივილები. მაქსიმალურად ვეცდებით, არც ერთი დევნილი არ დარჩეს საკუთარი ჭერის გარეშე, ვიდრე საკუთარ სახლ-კარს დაუბრუნდებიან", - განაცხადა ღარიბაშვილმა და აგვისტოს ომში დაღუპული გმირები გაიხსენა.