ევროსაბჭოს ადამიანის უფლებათა დაცვის კომისარი ნილს მუიჟნეკსი მოუწოდებს საქართველოს ხელისუფლებას უკანონო მოსმენებთან დაკავშირებით, ძველი ხელისუფლების პრაქტიკა არ გაიმეოროს.

როგორც „მოამბესთან“ სატელეფონო საუბრისას მიუჟნეკსიმ განაცხადა, მის მიერ გამოქვეყნებულ ანგარიშში ცალკე თავი სწორედ უკანონო მომმენებს უკავია.

ევროსაბჭოს კომისარი მიიჩნევს, რომ აღნიშნული პრობლემის მოგვარებას მთავრობა სერიოზულად უნდა მიუდგეს.

„ჩემს მოხსენებში არის ცალკე თავი უკანონო მოსმენებთან დაკავშირებით, რასაც ადგილი ჰქონდა წინა ხელისუფლების დროს და რაც არის ადამიანის უფლებების საკმაოდ უხეში დარღვევა. მე მივესალმები არალეგალურად ჩაწერილი ვიდეომასალის განადგურებას, ასევე პერსონალური მონაცემების დაცვის ინსპექტორის დანიშნვნას. მოვისმინეთ ოფიციალური განცხადებები, რომ არალეგალურად მოსმენები არ ხდება. მიუხედავად ამისა, საქართველოში არის ეჭვები, რომ ე.წ. ფარული მოსმენები ისევ მიმდინარეობს. მაგალითად საუბარია შავ ყუთებზე, რომლითაც აღჭურვილია ტელესაკომუნიკაციო ტელეკომპანიები, რაც სატელეფონო მოსმენების საშუალებას იძლევა. მთავრობა ამ თემას ძალიან სერიოზულად უნდა მიუდგეს. მთავრობამ უნდა გაითვალისწინოს რას ამბობს სახალხო დამცველი. საქართველოს ხელისუფლებამ არ უნდა გაიმეოროს ის შეცდომები, რასაც ადგილი ჰქონდა ყოფილი მთავრობის დროს. ვიცით, რომ ახალ კანონზე მიდის მუშაობა, კანონმდებლობა მნიშვნელოვანია, მაგრამ მისი აღსრულებაა მთავარი. ხელისუფლებამ ყველაფერი უნდა გააკეთოს ძველი პრაქტიკის მოსასპობად“, - განაცხადა მუიჟნეკსიმ.

ევროსაბჭოს ადამიანის უფლებათა დაცვის კომისარი ნილს მუიჟნეკსმა ანგარიში დღეს გამოაქვეყნა.

ანგარიშის მიხედვით, „საჭიროა დამატებითი ძალისხმევა მართლმსაჯულების სისტემის მიმართ საზოგადოების ნდობის გაძლიერებისა და ტოლერანტობის და უმცირესობათა უფლებების ხელშეწყობის მიზნით“.

“წინასწარი პატიმრობის შეფარდების რაოდენობის კლება და სასამართლოების მიერ გამოტანილი გამამართლებელი განაჩენების რიცხვის ზრდა, როგორც ჩანს, მიუთითებს მანამდე არსებული, ბრალდების მხარის შუამდგომლობებისა და დასაბუთებების სასამართლო განაჩენში თითქმის ავტომატურად ასახვის პრაქტიკისგან გადახვევაზე. მუდმივი სიფხიზლეა საჭირო სასამართლოს დამოუკიდებლობის დაცვისა და განმტკიცების უზრუნველსაყოფად. ასევე, მოსამართლეების დასაცავად დაუშვებელი ჩარევისგან. მნიშვნელოვანი ნაბიჯი იქნება დებულების გადასინჯვა მოსამართლეების სამწლიან გამოსაცდელ ვადასთან დაკავშირებით”, - ნათქვამია ანგარიშში.

სისხლის სამართლის გამოძიებებისა და სასამართლო საქმის წარმოების ხარვეზების შესახებ საჩივრებთან დაკავშირებით, კომისარი აღნიშნავს, რომ სასამართლო სისტემა უნდა იყოს იმდენად სტაბილური, რომ არჩევნების შედეგად ხელისუფლების ცვლილებას გაუძლოს.

„შეშფოთების საფუძველს იძლევა გამუდმებული ჩივილი სასამართლო პროცედურებთან დაკავშირებით არსებულ ნაკლოვანებებზე ისეთ შემთხვევებში, როდესაც საქმე პოლიტიკურ ოპონენტებს ეხება. საქართველოს მთავრობამ ყველას სამართლიანი სასამართლოს უფლების დაცვით, მათ შორის უდანაშაულობის პრეზუმფციის გათვალისწინებით უნდა მოაგვაროს ეს საკითხები”, - ნათქვამია ანგარიშში.