პარლამენტის ვიცე-სპიკერი მანანა კობახიძე ვარაუდობს, რომ შსს-ს დაბალ დანაყოფებში დღესაც არიან კადრები, რომლებიც „ნაცმოძრაობასთან" თანამშრომლობენ. მისი თქმით, ეს „არა მხოლოდ ხელისუფლების, არამედ საზოგადოების პრობლემაცაა“.

„სისტემა იმდენად მოშლილი იყო, იმდენად მანკიერი მხარეები არსებობდა სამართალდამცველ სისტემაში, პროკურატურაში, ყოფილ კუდსა და სოდში, რომ ბუნებრივია, ერთი ხელის მოსმით ამის გამოსწორება ძალიან რთულია. თუნდაც იმიტომ, რომ ჩვენ კადრებთან გვაქვს საქმე. როგორ ფიქრობთ, სად წავიდნენ ის ადამიანები, რომელბიც უკანონოდ ახორციელებდნენ საქმიანობას იგივე შსს-ში?

ჩვეულებრივი, ბანალური კრიმინალი დღემდე არსებობს. ადამიანებს ზედმეტ საფრთხეებს ვერ შევუქმნიდით, უნდა გაგრძელებულიყო სისტემის მუშაობა. შსს-ს დაბალ დანაყოფებში შესაძლოა დღესაც არიან კადრები, რომლებიც „ნაცმოძრაობასთან" თანამშრომლობენ. ეს არა მხოლოდ ხელისუფლების, არამედ საზოგადოების პრობლემაც არის. შეიქმნა სიტუაცია, როცა არაფრისგან არ არის დაზღვეული ხელისუფლება. ამ რეალობიდან გამომდინარე, გასაკვირი არ არის, რომ ასეთ პირებს ბოლომდე ვერ მივაგენით. ეს ახსნადი თემაა. მაგრამ, არ არის გამართლება და იმას არ ნიშნავს გავჩერდეთ",- განაცხადა კობახიძემ.