საქართველოს პრეზიდენტი გიორგი მარგველაშვილი მიიჩნევს, რომ „უკანონო მოსმენა ამაზრზენი და მიუღებელია“

როგორც მარგველაშვილმა ტელეკომპანია "იმედის" გადაცემა "პანორამას“ განუცხადა, უკანონო მოსმენებთან დაკავშირებით ბოლო პერიოდში განვითარებული მოვლენებისგან საზოგადოების მიუღებლობის გაზრდას და კანონმდებლობის დახვეწას ელის.

"მე არც ვიცი ბოლომდე რამდენად კვალიფიციურად შეიძლება დასკვნის გაკეთება იმის თაობაზე ვინც ამას უკანონოდ აკეთებს. ჩვენ ვიცით, რომ სახელმწიფოს გააჩნია კანონიერი მოსმენები და კანონიერი ინტერესი მართლწესრიგის დაცვისთვის. ჩვენ ვსაუბრობთ უკანონო მოსმენაზე, რომელიც ნებისმიერ შემთხვევაში, სახელმწიფოს მხრიდან იქნება თუ რამე კერძო პირის მიერ, არის ამაზრზენიც და მიუღებელიც. მე ვერსიებში არ ჩავრღმავდები. ორ რამეს ველი ამ პროცესისგან. პირველი: საზოგადოების მიუღებლობის გაზრდას ასეთი ამაზრზენი და უკანონო საქციელების მიმართ და მეორე: ამ მიმართულებით არსებული კანონმდებლობის ბოლომდე დახვეწას და საბოლოოდ მიღებას და ეს კანონმდებლობა იხვეწება", - აღნიშნა პრეზიდენტმა.

მისივე თქმით, უკანონო ჩანაწერებთან დაკავშირებით საზოგადოების დამოკიდებულება თვისობრივად შეცვლილია.
"სამწუხაროდ ჩვენი საზოგადოება დიდი ხნის განმავლობაში ამას მიაჩვიეს. თუმცა, მინდა ვთქვა, რომ ამჟამად, რეალურად, საზოგადოების დამოკიდებულება თვისობრივად შეცვლილია. თუ აქამდე ფარულ ჩანაწერს ისმენდნენ როგორც ჭეშმარიტებას, დღეს ასეთი ტიპის ინფორმაციის მიმართ არის მიუღებლობა და გარკვეული უარყოფა. ანალოგიური უნდა გადავიდეს მედიაში და ეს მედიის კულტურის ნაწილი უნდა გახდეს. თუ თვითონ მედიისთვისაც ამაზრზენი და მიუღებელი იქნება ასეთი ფორმით მუშაობა, ეს ძალიან პოზიტიურ შედეგს მოიტანს და ადეკვატური იქნება იმის, რასაც განიცდიან მოქალაქეები", - აღნიშნა პრეზიდენტმა.

ტელეკომპანია „რუსთავი 2“-მა ეკა კვესიტაძის გადაცემა „განსხვავებულ აქცენტებში“ მაღალჩინოსნების ფარული სატელეფონო საუბრების ჩანაწერები გაასაჯაროვა. გავრცელებულ ფარულ აუდიო ჩანაწერებში, პარლამენტის თავმჯდომარე დავით უსუფაშვილი, თავდაცვის მინისტრი ირაკლი ალასანია, უშიშროების საბჭოს ყოფილი მდივანი გიგა ბოკერია თბილისის ყოფილი მერი გიგი უგულავა, შალვა ობგაიძე და ბიზნესმენები ფიგურირებენ.