ტელეკომპანია "რუსთავი 2"-ის მიერ გავრცელებული სატელეფონო საუბრების შესახებ კომენტარი გააკეთა ,,ნაციონალური მოძრაობის“ ერთ-ერთმა ლიდერმა გიგა ბოკერიამ.

ბოკერია ასეთ ვითარებაში მიზანშეწონილად მიიჩნევს საპარლამენტო კომისიის შექმნას, რომელიც გამოიძიებს აღნიშნულ საქმეს, თუმცა უშიშროების ყოფილი მდივანი დასძენს, რომ ამ ხელისუფლების პირობებში მას ოპტიმიზმის საფუძველი არ აქვს.

,,ყველამ, ვინც მოვლენებს ოდნავ მაინც ადევნებს თვალყურს, დიდი ხანია იცის, რომ თვალთვალი მიმდინარეობს მათ შორის პირველ რიგში პოლიტიკურ ოპონენტებზე. ჩვენ გვახსოვს ჯერ მცდელობა, მოსამართლის ოფისში, საქალაქო სასამართლოში აპარატურის დამონტაჟებისა, ჩვენ გვახსოვს ახალაიას საკანში ჩაწერილი საუბარი, რომელმაც გაჟონა, გვახსოვს დეპუტატ ხაჩიძის ექსპერიმენტი, გვახსოვს ჩვენს მიერ მომზადებული პრეზენტაცია ინფრასტრუქტურის პროექტებზე, როგორ წინასწარ ცნობილი იყო ხელისუფლებისთვის. გუშინდელმა მასალამ, უბრალოდ კიდევ ერთხელ გაარკვია, რომ მასშტაბი არის ძალიან დიდი და მიყურადება მიმდინარეობს საზოგადოების თითქმის ყველა ჯგუფზე, მეტ-ნაკლებად აქტიურზე. ხოლო პრემიერის და პროკურატურის რეაქციამ დაადასტურა, რომ ამ ყველაფრის კვალი მიდის უმაღლეს პოლიტიკურ ხელმძღვანელობამდე და ეს არ გახლავთ რომელიმე სპეცსამსახურის თვითნებობა, ისეთი იყო მათი რეაქცია, როცა არც კი დაელოდნენ რაიმეს გარკვევას, სრულიად აბსურდული ბრალდებებით ხელი გაიშვირეს სხვისკენ და დაიწყეს მუქარა მედიის და ოპონენტების მიმართ. ამ ვითარებაში, საპარლამენტო უმრავლესობის რაიმე ნაწილს თუკი შერჩა რაიმე პოლიტიკური პრინციპი ან საღი აზრი, ერთადერთი რაც შეიძლება მოხდეს, არის ის, რომ შეიქმნას საპარლამეტო კომისია, ან უფრო გაფართოებული კომისია, რომელშიც შევლენ საზოგადოების ფართო სპექტრის წარმომადგენლები, უფლებადამცველთა ჯგუფების, რა თქმა უნდა პოლიტიკური პარტიების, რომელიც გამოიძიებს ამ საქმეს, თუმცა ამ მმართველი გუნდის, ამ ხელისუფლების პირობებში, მე არ მაქვს ოპტიმიზმის საფუძველი ამ თვალსაზრისით“, - განაცხადა გიგა ბოკერიამ.