ჟურნალისტი თამარ ჩერგოლეიშვილი საქართველოს ხელისუფლებისა და მთვარობის წევრებს მიმართავს. ჩერგოლეიშვილი „ფეისბუქის“ საკუთარ გვერდზე წერს, რომ ხელისუფლების წარმომადგენლებმა საქართველოს კანონს „სიტყვისა და გამოხატვის თავისუფლების შესახებ“ უნდა გადახედონ:

„ეძღვნება ქალბატონ ბესელიას, ქალბატონ კობახიძეს, ბატონ ჭიკაიძეს, ბატონ საგანელიძეს და სხვა პატივცემულ გვამებს, რომლებიც ხელისუფლებაში სწორედ ერთი წლის განმავლობაში სათუთად შენახული ფარული ჩანაწერების შედეგად მოვიდნენ და დღეს რუსთავი ორს ემუქრებიან სისხლის სამართლებრივი დევნით ფარული ჩანაწერის შენახვისა და წყაროს გაუმჟღავნებლობის გამო.

იხილეთ საქართველოს კანონი სიტყვისა და გამოხატვის თავისუფლების შესახებ:

მუხლი 3. სიტყვისა და გამოხატვის თავისუფლება

1. სახელმწიფო ცნობს და იცავს სიტყვისა და გამოხატვის თავისუფლებას, როგორც წარუვალ და უზენაეს ადამიანურ ფასეულობებს. ხელისუფლების განხორციელებისას ხალხი და სახელმწიფო შეზღუდულნი არიან ამ უფლებებითა და თავისუფლებებით, როგორც უშუალოდ მოქმედი სამართლით.

2. ყველას, ადმინისტრაციული ორგანოს გარდა, აქვს გამოხატვის თავისუფლება, რაც გულისხმობს:

გ) ნებისმიერი ფორმის ინფორმაციისა და იდეების მოძიების, მიღების, შექმნის, შენახვის, დამუშავებისა და გავრცელების უფლებას;

დ) ცენზურის დაუშვებლობას, მედიის სარედაქციო დამოუკიდებლობასა და პლურალიზმს, ჟურნალისტის უფლებას, დაიცვას ინფორმაციის წყაროს საიდუმლოობა და საკუთარი სინდისის შესაბამისად მიიღოს სარედაქციო გადაწყვეტილებები;

ი) მხილების თავისუფლებას და მამხილებელთა დაცვას;

ახლა რაც შეეხება ქალბატონ ბესელიას, რომელიც გვარამიას სისხლის სამართლის კოდექსით დაემუქრა. ქალბატონო ეკა, თავად თქვენ აღმოჩნდებით განსასჯელის სკამზე აი მაგ მუქარის გამო. რასაც თქვენ აკეთებთ, ეგ არის დანაშაული“, - წერს ჩერგოლეიშვილი.