მოქალაქე მარინე იაკობაშვილი ყოფილ პრემიერმინისტრს უპირისპირდება და მისი ოჯახის კუთვნილი ქონების მიტაცებაში ადანაშაულებს. იაკობაშვილის განცხადებით, მილიარდერმა მისი მიცვალებული ქმრის სახელზე რეგისტრირებული მიწის ნაკვეთი მიიტაცა და ტერიტორიაზე არსებული ნაგებობებიც გაანადგურა.

საუბარია სოლოლაკში ბიზნესცენტრის ტერიტორიაზე. მარინე იაკობაშვილი აცხადებს, რომ არჩევნებამდე და არჩევნების შემდეგ საქმის კურსში ჩააყენა „ქართული ოცნების“ ყველა ლიდერი და დაპირებებიც მოისმინა კომპენსაციის თაობაზე, თუმცა, წელიწადნახევრის შემდეგ თვლის, რომ იგი მიზანმიმართულად მოატყუეს.

დაზარალებული ადვოკატთა ასოციაციასთან ერთად დახმარებას საერთაშორისო ორგანიზაციებისგან ითხოვს:

„ჩემი მეუღლის სიცოცხლეშივე, 7 აპრილს დამტკიცებული იყო ბიზნესცენტრის პროექტი, ჩემი მეუღლე დაკრძალული არ იყო, 27 აპრილს მიმართეს მერიას, რომ მათთვის გამოეყოთ მიწა, ხოლო ჩემი მეუღლის გარდაცვლაებიდან ორ კვირაში, 1998 წლის 5 მაისს, გაცემული არის ბიზნესცენტრის მშენებლობის ნებართვა, როდესაც ჯერ მიწაც არ იყო მიმაგრებული მათზე, დოკუმენტაცია არის გაყალბებული, ბიძინა ივანიშვილმა ობოლ ბავშვებს წაართვა საცხოვრებელი, თავის შვილებს აუშენა და დღეს იქ ცხოვრობენ“, - განაცხადა მარინე იაკობაშვილმა.