ირაკლი ღარიბაშვილი: იმაზე მეტი შევასრულეთ რასაც დავპირდით ამომრჩეველს

პოლიტიკა - 22:32, 09 May, 2014

1951

საქართველოს პრემიერმინისტრმა ირაკლი ღარიბაშვილმა ტელეკომპანია „იმედის“ გადაცემა „რეაქციაში“ ხელისუფლების წინასაარჩევნო დაპირებებსა და მათ შესრულებაზე ისაუბრა. ღარიბაშვილის განცხადებით, ახალმა ხელისუფლებამ წინასაარჩევნოდ არსებულ დაპირებებზე მეტი შეასრულა: „ჩვენ როდესაც მოვედით ხელისუფელბაში, ჩვენი მთავარი დანაპირები იყო ის, რომ საქართველოს მოსახლეობას თავისუფლებას დავუბრუნებდით, დღეს საქართველოს თითოეული მოქალაქე არის აბსოლუტურად დაცული და არის თავისუფალი.
სასამართლო დღეს არის ისეთი დამოუკიდებელი, როგორიც არასოდეს. ჩვენ მაქსიმალური თავისუფლება მივეცით სასამართლოს და გავათავისუფლეთ პოლიტიკური ზეწოლისგან. მე მიმაჩნია, რომ ჩვენ ეს მოვახერხეთ, ეს რა თქმა უნდა არ არის იდეალური მდგომარეობა, მაგრამ ეს არის სერიოზული პროგრესი ამ მიმართულებით. თუნდაც პოლიცია, დღეს პოლიციის და პოლიციელის აღარ ეშინია მოსახლეობას, პოლიცია და ჯარი არის აბსოლუტურად დეპოლიტიზირებული.
პროკურატურაც არის აბსოლუტურად თავისუფალი. ჩვენი ოპონენტები ამბობენ იმასაც, რომ „რუსთავი 2“-ში ეს რაღაც მასკარადი და სპექტაკლი ჩვენი დადგმულია. ჩვენ განმარტებებს ვაკეთებთ ხალხისთვის, ჩვენ ვართ პირნათელი ჩვენი ამომრჩევლის წინაშე. ჩვენ იმაზე მეტი შევასრულეთ რასაც დავპირდით ამომრჩეველს. რაც შეეხება მედიას, დღეს მედია არის აბსოლუტურად თავისუფალი. ის რაც გადაიტანა ამ ტელევიზიის მფლოებელმა ოჯახმა, ეს არის პირადპირ კლასიკა. როგორ წაართვეს ტელეკომპანია იმედი მფლობელს არის კლასიკური მაგალითი, რომელშიც ჩართული იყო მიხეილ სააკაშვილი. შეგახსენებთ, რომ ამ თემაზე მიმდინარეობს გამოძიება. ჩვენ პენსიები გავზარდეთ საქართველოში, ამის გაკეთება რა თქმა უნდა შეეძლო წინა ხელისუფლებას მაგრამ არ აკეთებდნენ და საინტერესოა რატომ, ჩვენ გავაორმაგეთ ჯანდაცვის ბიუჯეტი“, - განაცხადა ირაკლი ღარიბაშვილმა.