საპარლამენტო უმცირესობის წევრი გივი თარგამაძე აცხადებს, რომ „დღეისათვის საქართველოს ხელისუფლებაში ინფუზორია ქალამანა, ანუ ფოსტალა, ამებას კლასის ორგანიზმები გაბატონდნენ“. ამის შესახებ თარგამაძე „ფეისბუქის“ საკუთარ გვერდზე წერს:

„ინფუზორია ქალამანა, ანუ ფოსტალა, ამება - ცოცხალ ორგანიზმთა კლასიფიკაციაში ეს არსებები უმარტივესთა კლასს განეკუთვნებიან. სამწუხაროდ, დღეისათვის საქართველოს ხელისუფლებაში სწორედ ამ კლასის ორგანიზმები გაბატონდნენ. ამიტომ არ უნდა გაგვიკვირდეს. შეიძლება, გაგებით ვერ მოვეკიდოთ, მაგრამ გაკვირვებით კი არ უნდა გაგვიკვირდეს, თუნდაც ის, რომ დღეს უმარტივესთა პროკურატურამ საკუთარ თავსა და მთელს მთავრობას დიდი ორმო გამოუთხარა და პირდაპირ თავით ჩააგრიხინა შიგ. ყველა კითხვა მოხსნეს იმის თაობაზე, წინა ხელისუფლების დროს ხომ არ იყო სათვალთვალო აპარატურა დამონტაჟებული, ინსინუაციას ხომ არ ჰქონდა ადგილი. არა; პირდაპირ დაადასტურეს, რომ ყველაფერი დღევანდელმა ხელისუფლებამ გააკეთა ჰაკიმის შსს მინისტრობის დროს და შემსრულებლებიც დაასახელეს. რ2-ს უსაფრთხოების სამსახურის უფროსი 6 თუ 8 თვის წინ გადავიდა სამუშაოდ ჯერ სუს-ში, შემდეგ ოდრ-ად გარემოს დაცვის სამინისტროში, ამჟამად კი სასჯელაღსრულების დეპარტამენტის ხელმძღვანელის მოადგილეა უსაფრთხოებისა და ბადრაგირების დარგში. ამ მოკლე პერიოდში მშვენიერი ხელფასისა და პრემიების გარდა, ერთი ბინა აჩუქეს და ერთიც იყიდა ისე, რომ კრედიტი არ აუღია. რა მარტივია და უმარტივესებს ესმით. რას იზამ, მეტი არ შეუძლიათ, ფიზიკურად. ქალამანას ფანტაზიას ვერ მოსთხოვ, ის ხომ უმარტივესია“, - წერს თარგამაძე.